«Sberbank Qazaqstanǵa» jańa lıtsenzııa alý talap etilmeıdi - Mádına Ábilqasymova
«Qazirgi kezde bul bank qyzmet kórsetip jatyr. Sonymen qatar onyń lıtsenzııasy bar jáne turaqty bank retinde jumysyn jalǵastyryp otyr. Atalǵan banktiń aktıvteri sanktsııalar engizilgennen beri qysqarǵanyn atap ótken jón. Sanktsııalar engiziler aldynda «Sberbank Qazaqstan» aktıvter boıynsha elimizdiń bank júıesinde ekinshi orynda boldy», - dedi M. Ábilqasymova Senatta tilshiler saýalyna jaýap bere otyryp.
Sonymen qatar ol qazirgi kezde «Sberbank Qazaqstannyń» aktıvteri azaıǵanymen, onyń tólem qabilettiligi saqtalyp otyrǵanyn aıtty.
«Bul bankti satý týraly sheshim qabyldanýyna baılanysty, onyń aktsıoneri tıisti kelissóz júrgizip jatyr. Kelisimshart bekitilse, ıaǵnı menshik ıeligine qatysty aktsııalardyń 100 paıyzy satyp alǵan tarapqa ótkiziledi. Bul óz kezeginde bankke jańa lıtsenzııa alýdy talap etpeıdi. Sondyqtan elimizde jańa bank paıda bolmaıdy, tek aktsıoneri ǵana aýysady», - dep túsindirdi agenttik basshysy.
Onyń aıtýynsha, atalǵan banktiń kapıtaly jetkilikti kólemde.
Budan buryn habarlanǵandaı, «Báıterek» holdıngi «Sberbank Qazaqstandy» satyp alýǵa qatysty kelissóz júrgizip jatyr.