«Saz álemindegi» synaq: Dımash 7 jyl burynǵy oqıǵany eske aldy

NUR-SULTAN. QazAqparat – Ánshi Dımash Qudaıbergen alǵash ret 7 jyl burynǵy oqıǵaǵa qatysty pikir bildirdi. Ol tusta ánshi «Saz álemi» baǵdarlamasyna qatysyp, otandyq tóreshilerdiń synyna ilikken bolatyn, dep habarlaıdy QazAqparat tilshisi.

«Qurmetti dostar! Kúni keshe «Rossııa» arnasynan «Prıvet, Andreı̆!» efırin kórgen bolarsyzdar. Baǵdarlamada shaǵyn, biraq óte mańyzdy bir epızod kórsetildi. Ol jerde men óz elimdi súıetinimdi jáne jerlesterimdi qurmetteıtinimdi aıttym. 2013 jyly «Saz álemi» baǵdarlamasynda bolǵan oqıǵa – búkil qazaqstandyqtardyń maǵan degen qarym-qatynasynyń kórsetkishi emes. Men 2013 jylǵy bul baǵdarlamadan buryn da dál osylaı án shyrqap, halyqaralyq konkýrstarda júlde alyp júrdim. Qalaı durys dep sheshsem, solaı án salyp júrmin. Shyǵarmashylyǵymnyń qandaı bolatynyn da ózim sheshemin», - dep jazdy ánshi Dımash Qudaıbergen.

Ánshi bul rette ata-anasy men dostary kóp qolǵabys etetinin jazady. Ol eń aldymen Qazaqstannyń arqasynda osyndaı dárejege jetkenin sóz etti.

«Men Qazaqstanda týyp-óstim, qazaqtyń as-sýyn iship, qazaq vokal muǵaliminen tálim aldym, qazaq otbasynda óstim. Meni alǵa jeteleıtin basty yntalandyrýshy - meniń ultym jáne elim! Amerıka nemese Qytaı bolsyn, meniń mansabym qarqyn ala bastaǵanda halyqaralyq jarystarǵa jalǵyz ǵana nıetpen bardym . Ol maqsat - óz elimniń abyroıyn asqaqtatý. Mundaı talap-tilegim bolmasa, múmkin men shetelde óner kórsetpes edim. 2013 jylǵy vıdeo týraly aıtar bolsam, dostar, shynymdy aıtsam, men bul vıdeony qaıtadan kóremin dep oılaǵan joqpyn, óıtkeni ony umytyp ta ketken edim. «Reseılik áriptesterimniń aldynda óz ánshilerimizdi qorǵaı almady, áli kúnge deıin bireýge ókpeli» dep oılap qalmańyzdar. Qajetsiz estelikterdi umyta alamyn. Sol keshte óz otandastarymdy qorǵap sóılesem de, ókinishke qaraı, ol fragment efırge enbeı qalǵan. Sol vıdeony bir-birimizge taratýdy qoıaıyqshy, dostar», - dep jazady ánshi Instagram paraqshasynda.

Dımash qansha jyl ótse de, sol vıdeonyń talqylana beretinine qaıran qaldy.

«Bala kezimnen synǵa daıyn boldym, obektıvti bolsyn-bolmasyn - báribir, meni renjitý óte qıyn. Sol vıdeodaǵy adamdar da áli kúnge deıin qansha halyqtan sóz estip jatyr. Árkimniń óz pikiri bar, ol ýaqyt óte kele ózgergen bolýy múmkin, ózgermeýi de yqtımal. Biraq bári ótken kúnde qaldy. Árkimniń óz otbasy, balalary bar, menińshe, olarǵa adamdardan aýyr sóz estý ońaı emes. Bul vıdeonyń ár ýaqytta ár elde aıaq astynan shyǵa keletini maǵan unamaıdy», - dep túıindedi ánshi.