Saıramda sanıtarlyq talapty saqtamaǵan 3 mal soıý orny jabyldy
Saıram aýdany Qarabulaq aýyldyq okrýginde ornalasqan mal bordaqylaý alańdary men mal soıý beketteriniń jumystary jappaı tekserilip jatyr. Jumys tobynyń anyqtaýymen ázirge sanıtarlyq talaptardy múldem saqtamaǵan 3 mal soıý oryny jabyldy. Qalǵan 8 bekettiń basshylaryna mal soıý alańdaryn zaman talabyna saı retke keltirýge 1 aı ýaqyt berildi.
Osyǵan deıin Saıram aýdanynda jergilikti kásipkerlerimen kezdesken oblys ákimi Darhan Satybaldy Qarabulaq aýyldyq okrýginde ornalasqan mal soıý oryndarynyń jumysyn qatań synǵa alyp, jaýapty basshylarǵa naqty tapsyrmalar bergen bolatyn. Ákim tarapynan zańsyzdyqty joıyp, aýyldan alys aýmaqta zaýyttar ashý boıynsha usynystar berildi. Nátıjesinde jeke kásipker óz qarajaty esebinen mal soıý oryndarynan shyqqan qandy tógetin Bekkarı shuńqyryn daıyndap, ınsenerator peshterin ornalastyratyn boldy.
Máseleni túbegeıli sheshý úshin oblys ákimi jergilikti kásipkerlerge mal qaldyqtaryn tereń óńdeıtin zaýyttar salýdy usynǵan edi. Búgin Túrkistan qalasyna kelgen saıramdyq kásipkerler oblys ákimine birneshe iri jobany tanystyrdy. Máselen, 25 gektar jerge mal bordaqylaý kesheni, mal soıý alańy, etti tereń óńdeıtin tseh qurylysy men qandy óńdeý kásipornynyń qurylysy bastalady. Sondaı-aq, et ónimderin jáne maldyń qaldyqtaryn tereń óńdeıtin zaýyt salynady.
«Kórshiles elden maldyń qaldyǵyn tereń óńdeıtin zaýyt ashý jóninde usynyspen kelip jatqan ınvestorlar bar. Biraq, biz aldymen jergilikti kásipkerlerge, sizderdiń jobalaryńyzǵa qoldaý kórsetemiz. Jobany ózimizdiń azamattardyń júzege asyrýy tıimdi. Alaıda, bizge naqty jospar, jumystyń oryndalý merzimi qajet. Búgin sizder usynǵan jobalar boıynsha zań sheńberinde qoldaý kórsetiledi. Basty maqsatymyz - jumys oryndaryn ashý, óndiris kólemin arttyrý», - dedi Darhan Satybaldy.
Saıram aýdanynyń Qarabulaq aýyl okrýginde eki mal bazary bar. Aýdan boıynsha táýligine orta eseppen 3 myńǵa jýyq mal soıylady.
Aıta keteıik, buǵan deıin Qarabulaq aýdanynda ornalasqan 9 mal soıý pýnktine aıyppul salynǵanyn jazǵan bolatynbyz.
Al, sáýir aıynda Saıramdyqtar egistikti qoıdyń qany aralasqan sýmen sýarýǵa májbúr bolǵan.