Saıramda 17 myń adam úı salý úshin jer alýǵa ótinish bergen
Jıynǵa aýdan ákiminiń orynbasarlary, Nur Otan partııasy Saıram aýdandyq fılıalynyń birinshi orynbasary, aýdandyq máslıhat hatshysy, ardagerler, zııaly qaýym jáne BAQ ókilderi men jergilikti turǵyndar qatysty.
Aýdan ákimi Ulasbek Sádibekov jer berý máselesi tek qarasýlyqtardyń emes, búgingi tańda Saıram aýdany boıynsha ózekti máselege aınalǵanyn atap ótti.
«Qazir aýdan boıynsha turǵyn úı salý úshin jer alýǵa 17 myńnan astam azamat ótinish bildirgen. Alaıda, bul maqsatta úlestire salýǵa jer telimi bolmaı tur. Aýyl sharýashylyǵy maqsatyndaǵy jer telimderin úı salýǵa taratyp bersek, sharýasyz halyq qalaı kún kóredi? Sondyqtan, bul máseleni qazir tereńirek zerdelep, oblys ákimi Ómirzaq Shókeevtiń nazaryna usynamyz. «Arba synbaıtyn, ógiz ólmeıtin» amalyn tabýymyz kerek. Al naqty jaýapty sodan keıin ǵana aıta alamyn», – dedi Ulasbek Sádibekov.
Aýdan basshysynyń sózinshe, qazirgi tańda aýdanda 1861 azamat turǵyn úı kezeginde tur. Olardy baspanamen qamtý maqsatynda Qarasý aýylynda 300 páterlik 5 dana kópqabatty turǵyn úı qurylysynyń jobasy daıyndalyp, respýblıkalyq bıýdjetke usynylǵan. Qajetti 2,6 mlrd teńge qarjy máselesi sheshilgen jaǵdaıda, kezekte turǵan 300 azamattyń turǵyn úı máselesi sheshiledi.
Jıynda budan bólek aýyl shetindegi karerdiń kóptiginen aǵyn sý arnasynan tómendep ketkenin aıtyp shaǵymdandy. Turǵyndar aýyl irgesin jarqabaqqa aınaldyrǵan kásipke shekteý qoıýdy surady. Aqbaı-Qarasý kanalynyń ústine salynǵan úıdiń máselesi zańmen qaralýy múmkin.