Saıram aýdanynda bóbekjaı ujymy jalaqysynyń keshiktirilgenine shaǵymdandy

TÚRKІSTAN. QazAqparat – Túrkistan oblysynyń Aqsýkent aýylyndaǵy «Kúnshýaq» bóbekjaıynyń ujymy aılyq jalaqysynyń keshiktirilgenine shaǵym túsirdi. Olar karantınge baılanysty qyzmetkerlerdiń 70%-ǵa qysqarǵanyna narazylyq bildirdi, dep habarlaıdy QazAqparat tilshisi.

Saıram aýdany ákimdigi baspasóz qyzmetiniń málimetinshe, bóbekjaı qyzmetkerlerimen kezdesý barysynda budan ózge de birqatar másele aıtylǵan. Tárbıeshiler karantın rejımine baılanysty balabaqsha jumysynyń toqtap qalǵanyn alǵa tartyp, jumysyn qaıta bastaýǵa ruqsat berýdi talap etti. Aýdandyq adamı áleýetti damý bóliminiń (bilim bólimi) basshysy Quralaı Baltabaıqyzy «Kúnshýaq» bóbekjaıy» ujymyna qańtar aıyna aılyq aýdarylǵanyn, endi aqpan aıynyń qarjysy aldaǵy úsh kúnde beriletinin jetkizdi. Al, jalaqynyń keshigý sebebin aǵymdaǵy jyly aýdan aýmaǵyndaǵy barlyq bilim berý mekemesi men kásiporyndar, onyń ishinde «Kúnshýaq» bóbekjaıy Túrkistan oblystyq kommýnaldyq menshigine ótýine baılanysty qujattary qaıta rásimdelgenimen túsindirdi.

«Balabaqsha qaıta tirkeýden ótip, oblystyq bıýdjet esebinen qarjylandyrý barysynda qańtar aıynyń jalaqysy keshikken. Al aılyq 70%-ǵa qysqarmaǵan. Saıram aýdanynyń adamı áleýetti damý bóliminiń «Kúnshýaq» bóbekjaıy» MKQK-nyń 2021 jyldyq shtat sany – 78,7. Bóbekjaıdyń bala syıymdylyǵy – 280, al tizim boıynsha – 167 balaǵa joldama alynǵan. 78,7 shtat sanyna 280 balaǵa dep 1 aıǵa qamtylǵan qarajat sommasy – 9 450 560 teńge bolýy kerek. Alaıda, qarjy 167 balanyń joldamasy boıynsha, zań aıasynda 5 mln 636 myń 584 teńge balabaqsha esebine aýdaryldy» delingen habarlamada.