Saılaýshylardyń belsendiligi Qazaqstan azamattarynyń jaýapkershiligi joǵary ekenin dáleldedi - A.Vybornyı

ASTANA. QazAqparat - Saılaýshylardyń belsendiligi Qazaqstan azamattarynyń jaýapkershiligi joǵary ekendigin dáleldedi. Bul týraly búgin QR Ortalyq saılaý komıssııasynda ótken brıfıngte UQShU baıqaýshylary mıssııasynyń jetekshisi Anatolıı Vybornyı aıtty.

«Árbir turǵyn eldiń bolashaǵy óziniń sheshimine baılanysty ekenin jete túsingen. Bul Qazaqstan halqynyń quqyqtyq mádenıeti joǵary ekendigin bildiredi. Olar óz eliniń azamaty jáne óz qalaýyn bildirýge mindetti», - dedi ol.

Halyqaralyq baıqaýshynyń atap ótýinshe, UQShU mıssııasy baıqaýshylarynyń Qazaqstandaǵy jumysy barysynda saılaýdyń nátıjesine áser etetindeı zań buzýshylyqtar oryn alǵan joq.

«Biz tek daýys berý protsedýrasyn jetildirýge qatysty birqatar usynystar bere alamyz. Máselen, saılaý ýchaskeleri músheleriniń sanyn kezek bolmaýy úshin 7-den 9 nemese 11 adamǵa deıin kóbeıtý qajet. Daýys berýde azamattarǵa jaıly jaǵdaı jasalýy kerek», - dedi A.Vybornyı.