Saılaýǵa túsetin kandıdattardyń memleket esebinen óteletin shyǵyndarynyń mólsheri qansha
«Saılaý týraly» QR Konstıtýtsııalyq zańy 28-babynyń 3-tarmaǵy boıynsha, memleket kandıdattarǵa óz baǵdarlamalarymen kópshilik aldynda sóz sóıleý úshin teńdeı qarajat bólýge kepildik beredi. Qarajatty bólý tártibi men kólemin Ortalyq saılaý komıssııasy anyqtaıdy. «Saılaý týraly» QR Konstıtýtsııalyq zańy 33-babynyń 2-tarmaǵy 2,3,4-tarmaqshalary boıynsha, respýblıkalyq bıýdjet qarjysynyń esebinen kandıdattyń buqaralyq aqparat quraldaryna «Saılaý týraly» Konstıtýtsııalyq zańnyń 28-baby 3-tarmaǵy boıynsha shyǵý shyǵyndary, kandıdattardyń saılaý aldyndaǵy buqaralyq sharalar ótkizý shyǵyndary, kandıdattardyń úgit-nasıhat materıaldaryn «Saılaý týraly» Konstıtýtsııalyq zańnyń 28-baby 4 jáne 5-tarmaǵyna saı etip shyǵarý shyǵyndary, kanıdattardyń kólik shyǵyndary OSK bekitken mólsherde óteledi», - dep túsindirdi OSK múshesi Sábıla Mustafına.
Onyń málimeti boıynsha, partııalyq tizimmen saılaýǵa túsip jatqan kandıdattarǵa respýblkıalyq bıýdjetten qarajat bólý qarastyrylmaǵan.
«Saılaý zańnamasynyń osy normalaryn iske asyrý úshin OSK kandıdattarǵa BAQ-ta sóz sóıleý úshin qarajat bólý erejesi men kólemin bekitý týraly qaýly qabyldady. Osy qaýlyǵa sáıkes, kandıdatqa óz baǵdarlamalarymen BAQ-ta sóz sóıleý úshin 15 mınýt, radıoda – 15 mınýt, baspa basylymdarynda nemese jelilik basylymdarda baspa paraǵynyń 0,1%-ynan aspaıtyn eki maqala jarııalaý úshin qarajat bólý kózdeledi. Osylaısha, respýblıkalyq bıýdjet qarajatynan jabylatyn kandıdattar shyǵystarynyń mólsherin belgileý týraly OSK qaýlysynyń tórt jobasy engiziledi», - dedi ol.
OSK múshesiniń aıtýynsha, Májilis depýtattyǵyna partııalyq tizimnen tys kandıdatqa 950 myń teńge kóleminde shyǵys mólsheri belgilenbek.
«Onyń 450 myń teńgesi tele jáne radıo baǵdarlamalarda sóıleýge, sondaı-aq merzimdi baspa nemese jelilik basylymdarda eki maqala jarııalaýǵa jumasalady. Al, saılaý aldyndaǵy buqaralyq is-sharalardy ótkizýge jáne úgit materıaldaryn shyǵarýǵa 300 myń teńge, kólik shyǵyndaryna 200 myń teńge qarastyrylady», - dedi Sábıla Mustafına.
OSK qaýlysynyń ekinshi jobasy boıynsha, oblystardyń, respýblıkalyq mańyzy bar qalalardyń jáne astananyń máslıhattary depýtattyǵyna partııalyq tizimnen tys úmitkerlerge shyǵys kólemi 550 myń teńge kóleminde belgilenbek.
«Onyń 350 myń teńgesy tele jáne radıo baǵdarlamalarda sóıleýge, merzimdi baspa nemese jelilik basylymdarda eki maqala jarııalaýǵa jumsalýy kerek. Al, saılaý aldyndaǵy jarııa is-sharalardy ótkizýge jáne úgit materıaldaryn shyǵarýǵa 130 myń teńge, kólik shyǵyndaryna 70 myń teńge qarastyrylǵan», - dedi OSK múshesi.
OSK qaýlysynyń úshinshi jobasy qalalyq máslıhat depýtattyǵyna kandıdattardyń memleket esebinen tólenetin shyǵynyn belgileıdi.
«Bul baǵyttaǵy shyǵystar mólsheri 350 myń teńge kóleminde belgilenedi. Onyń ishinde tele jáne radıo baǵdarlamalarda sóıleýge – 200 myń teńge, saılaý aldyndaǵy buqaralyq is-sharalardy ótkizip, úgit materıaldaryn shyǵarýǵa – 100 myń teńge, kólik shyǵyndaryna – 50 myń teńge», - dedi Sábıa Mustafına.
Qaýlynyń tórtinshi jobasy boıynsha aýdandyq máslıhat depýtattyǵyna kandıdattardyń memleket esebinen óteletin shyǵyn kólemi 350 myń teńge bolmaq.
«Onyń ishinde tele jáne radıo baǵdarlamalarda sóıleýge – 200 myń teńge, saılaý aldyndaǵy buqaralyq is-sharalar ótkizip, úgit materıaldaryn shyǵarýǵa – 100 myń teńge, kólik shyǵyndaryna – 50 myń teńge», - dedi ol.
Eske salsaq, keshe Májilis pen máslıhat saılaýynyń úgit-nasıhat kezeńi bastaldy.
Sondaı-aq, Ortalyq saılaý komıssııasy partııalardyń ataýlary saılaý bıýleteninde qandaı tártippen ornalasatynyn jerebe arqyly anyqtaǵan bolatyn.