Saılaýǵa sheteldik baıqaýshylar tarapynan qyzyǵýshylyq joǵary bolady - Z.Baımoldına

NUR-SULTAN. QazAqparat - 2019 jyldyń 9 maýsymynda ótetin kezekten tys prezıdenttik saılaýǵa sheteldik baıqaýshylardy akkredıtteý bastaldy. Bul týraly búgin Ortalyq saılaý komıssııasynyń otyrysynan keıin BAQ ókilderiniń saýalyna jaýap bergen OSK múshesi Záýresh Baımoldına aıtty, dep habarlaıdy QazAqparat tilshisi.

Zańnamaǵa sáıkes baıqaýshylardy akkredıtteý Ortalyq saılaý komıssııasynyń arnaıy qaýlysy qabyldanǵannan keıin birden bastalady. Búgin akkredıtteý jumysyn bastaýǵa bolady. Sheteldik baıqaýshylardy akkredıtteý elimizdiń Syrtqy ister mınıstrliginiń usynymy boıynsha júzege asyrylady», - dedi OSK múshesi.

Onyń aıtýynsha, kezekten tys prezıdenttik saılaýǵa EQYU, DIAQB, Parlamenttik assambleıasy, Eýropalyq keńes, TMD Parlamentaralyq assambleıasy, ShYU, UQShU, TúrkPA mıssııalarynan baıqaýshylar keletindigi kútiledi.

«Óz mıssııasyn uıymdastyratyn barlyq halyqaralyq uıymǵa shaqyrý jiberiledi. Shet memleketter men halyqaralyq uıymdardan qansha baıqaýshy bolatyndyǵyn dál qazir naqty aıta almaımyz. Ótken saılaýlardaǵy málimetterge súıenip shamalap aıtýǵa bolady. 2015 jylǵy prezıdenttik saılaýǵa 1024 baıqaýshy keldi. Bul joly 1 myńnan astam, ary ketkende 1600-1700 baıqaýshy bolady dep kútemiz. Ózderińiz de bilesizder, bul jylǵy ahýal standarttan tys, saılaýǵa qyzyǵýshylyq áldeqaıda joǵary bolýy múmkin», - dedi Záýresh Baımoldına.