Saılaýǵa qatysqan 1747 aýyl ákimi ózderiniń laýazymyn saqtap qaldy - OSK

ASTANA. 10 tamyz. QazAqparat - Saılaýǵa qatysqan 1747 ákim óziniń laýazymyn saqtap qaldy. Osylaısha saılanǵan ákimderdiń quramy 28,8 paıyzǵa jańardy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıng barysynda QR Ortalyq saılaý komıssııasynyń tóraǵasy Qýandyq Turǵanqulov málim etti.

«Saılanǵan ákimderdiń nátıjesinde 23 ulttyń ókili bar. Ákimder laýazymyna 280 (11,4 paıyz) áıelder saılandy. Bul burynǵyǵa qaraǵanda 32-ge kóp. Ákimderdiń ortasha jasy 47 jasty quraıdy. Saılanǵan ákimderdiń arasynda 627-si nemese 25,6 paıyzy pedagog mamandar, 501 nemese 20,4 paıyzy aýyl sharýashylyǵy salasynyń mamandary 417 nemese 17 paıyzy ınjenerler, 357 nemese 14, 5 paıyzy ekonomıster, al 281-i, ıaǵnı 11,1 paıyzy zańgerler, 271-i nemese 11 paıyzy basqa da mamandar», - dedi OSK tóraǵasy.

Onyń aıtýynsha, is basyndaǵy ákimderden kandıdat retinde saılaýǵa 1811 adam qatysty. Olardyń ishinde 1747-si óziniń laýazymyn saqtap qaldy. «Osylaısha saılanǵan ákimderdiń quramy 28,8 paıyzǵa jańardy», deıdi Q. Turǵanqulov.

Eske salsaq, QR Perzıdentiniń jarlyǵyna sáıkes, aǵymdaǵy jyldyń 5-9 tamyz aralyǵynda elimizdiń 14 oblysynda aýdandyq mańyzy bar qalalar, aýyldyq okrýgter, aýyldyq okrýgterdiń quramyna kirmeıtin kentter men aýyldardyń 2457 ákiminiń saılaýy ótip, barlyǵy 2454 ákim saılandy. Úsh aýyldyq okrýgte jeńimpazdar anyqtalǵan joq. Sebebi tańdaýshylardyń daýystary teń bólindi. Atalǵan ákimshilik aýmaqtyq qurylymda tamyzdyń 28-inde qaıta saılaý ótkiziledi.

Onyń aıtýynsha, saılaý naýqany barysynda barlyǵy 7173 ákimdikke kandıdat usynylyp, 6738-i tirkeldi. Daýys berý bıýlletenderine 6403 kandıdattyń tegi engizildi. Ortasha alǵanda bir ákim laýazymyna ekiden asa úmitker qatysqan. «Saılaýǵa jalpy respýblıka boıynsha tańdaýshylardyń (máslıhat depýtattarynyń) 98,3 paıyzy qatysty», deıdi OSK tóraǵasy.