Saılaýǵa belsene aralasatyn jastardyń qatary artyp keledi - «Amanat» platformasy
«Saılaý barysynda buzýshylyqtarǵa qatysty 165 aýyzsha eskertý jasaldy, onyń bári der kezinde joıyldy. Qosymsha 18 eskertý sol arada túzelgen joq nemese bul kemshilikter eleýli sanalyp, olar boıynsha aktiler toltyrylǵan. Sol 18 aktiniń ishinde 8-i saılaý jáshigine toptap bıýlletender salýǵa qatysty bolyp otyr», - deıdi platforma ákimshisi Lıma Dıas.
Bul rette ol saılaýdyń Qazaqstan úshin erekshe bolǵanyn atap ótti. Máselen, Prezıdent saılaýy eldiń úlken belsendiligi men jaýapkershiligin arttyryp, kóptegen azamattarynyń naqty ustanym bildirip, qadam jasaýyna áser etken.
«Belsendilerdiń tsıfrlary da osyny kórsetedi, olar ózderi de baıqaýshy bolyp óz erikterimen protseske aralasty. Jas belsendiler ortaq qundylyqtardy bólisip, platforma qyzmetine de qatysty. Qurylǵanymyzǵa eki aı bolǵanyna qaramastan, biz qatarymyzǵa 16 myńǵa jýyq adam tarta aldyq. Qazaqstan boıynsha 700-ge jýyq úkimettik emes uıym atsalysty. Biz táýelsiz toptar men qoǵamdyq uıymdarǵa túrtki boldyq. Nátıjesinde qazirgi kúni «Amanat» barlyq oblystarda óziniń shtabyn ashty», - dedi Lıma Dıas.
Onyń aıtýynsha, platforma bes baǵytta jumys isteıdi. Onyń biri ádildik. Osy baǵytta táýelsiz baıqaýshylardy daıarlaý da júzege asa bastaǵan.
«Biz Qazaqstan boıynsha eń kóp táýelsiz baıqaýshylardy daıarladyq. Saılaý ýchaskelerin 100 paıyz qamtyp, 11 myńǵa tarta táýelsiz baıqaýshylardy jumysqa kiristirdik. Bul biz úshin ǵana emes, elimiz úshin de alǵashqy tájirıbe. Jetken jetistikpen toqtap qala almaımyz, Baıqaýshy bolýdy qalaıtyn azamattardyń qatary da artyp kele jatyr», - dedi ol.