Saılaýǵa 13 kún qaldy: Kamala Harrıs Donald Trampty fashıst sanaıdy

<p>ASTANA. KAZINFORM &ndash; AQSh prezıdenttigine kandıdat Kamala Harrıs sársenbi kúni saılaýshylarmen kezdesýde qarsylasy Donald Trampty fashıst dep sanaısyz ba degen suraqqa &laquo;ıá&raquo; dep jaýap berdi, dep habarlaıdy <a href="https://www.bbc.com/news/articles/c1dp7xnyr51o" target="_blank" rel="noopener">BBC.&nbsp;</a></p>

«Iá, men solaı oılaımyn. Men sondaı-aq onyń osy jaǵyn jaqsy biletin adamdarǵa sený kerek dep oılaımyn», - dep jaýap berdi Harrıs zaldan túsken suraqqa.

Harrıs Trampty jaqsy biletin adamdar týraly aıtqanda, ol prezıdent Tramptyń burynǵy apparatynyń basshysy Djon Kellıdi meńzegen bolýy múmkin. Ol seısenbide eki suhbatynda Donald Trampty fashıst dep atady.

Kellı The New York Times gazetine bergen suhbatynda Tramptyń basqarýda dıktatorlyq kózqarasty jaqtaıtynyn jáne onyń kózqarastary «fashızmniń jalpy anyqtamasyna sáıkes keletinin» aıtty. 

The Atlantic basylymyna bergen suhbatynda Kellı baspasózde taǵy tolyqtyrdy: onyń aıtýynsha, Tramp bir kezderi natsıstik generaldar Adolf Gıtlerge baǵynǵanyndaı, qyzmetkerleriniń de oǵan sózsiz baǵynǵanyn qalaıtynyn aıtqan.

Tramp buǵan jaýap retinde Truth áleýmettik jelisinde Kellıdi azǵyn dep atap, onyń natsıstik generaldar týraly áńgimesiniń ótirik ekenin málimdedi.

Degenmen CNN arnasynyń tilshisi Djım Shýttonyń «Uly derjavalardyń oralýy» kitabyna bergen suhbatynda Kellı Tramptyń Gıtler basshylyǵynyń keıbir aspektilerin joǵary baǵalaǵanyn aıtty. Kellı Tramptyń: «Biraq Gıtler birneshe jaqsy is jasady» degen sózin eske aldy. 

Djon Kellı eks-prezıdenttiń natsıstik dıktator men onyń armııasyna tańdanysy týraly aqparatty jarııalaǵannan keıin Harrıs Vashıngtondaǵy rezıdentsııasynyń aldynda sóıledi.

«Donald Tramptyń alty mıllıon evreı men júzdegen myń amerıkalyqtardyń ólimine sebepker bolǵan Adolf Gıtlerge silteme jasaýy shynymen de alańdatarlyq jáne óte qaýipti. Munyń bári Donald Tramptyń shyn máninde kim ekenin dáleldeıdi», - dedi ol.

Demokratııalyq kandıdattyń syny AQSh-taǵy prezıdenttik saılaýǵa nebári 13 kún qalǵan kezde aıtyldy.

Osy arada, The Wall Street Journal basylymynyń habarlaýynsha, prezıdenttik saılaýǵa Respýblıkalyq partııadan úmitker Donald Tramp saılaýǵa eki aptadan az ýaqyt qalǵanda vıtse-prezıdent Kamala Harrısti az ǵana artyqshylyqpen – 47%-dan 45%-ǵa deıin ozdy.