Saılaýdyń tabysty ótýine Qazaqstannyń barlyq kórshileri múddeli - grekııalyq jýrnalıst

NUR-SULTAN. QAZAQPARAT - Sońǵy 30 jylda Qazaqstan Eýropa úshin, sonyń ishinde Grekııa eli úshin Ortalyq Azııadaǵy turaqtylyq aımaǵy retinde tanyldy. «Rýsskıe Afıny» grekııalyq aqparat agenttiginiń bas redaktory P.Onoıko osyndaı pikir aıtty, dep habarlaıdy QazAqparat tilshisi.

Grekııalyq jýrnalıst Qazaqstannyń aıtarlyqtaı kúrdeli geosaıası ortada ornalasqanyn, aýmaqqa Aýǵanstan men Irannyń, Taıaý Shyǵystyń tikeleı de, janama da áseri bar ekenin atady. Ol óz sózinde Qazaqstannyń Kavkaz sııaqty kúrdeli óńirmen shekaralas jatqanyn, Eýrazııa ekonomıkalyq odaǵyna múshe ekenin, soltústiginde Reseımen qurlyqtaǵy eń úlken shekarany bólisip otyrǵanyn eske saldy. Qytaımen aradaǵy ekonomıkalyq jáne ınvestıtsııalyq baılanysqa da toqtalǵan agenttik ókili eýropalyq qaýymdastyq eldegi saıası protsesterdi qyzyǵýshylyqpen baqylap otyr degen oı aıtty.

«Osynyń bárin eskeretin bolsaq, Qazaqstandaǵy saılaýdyń halyqaralyq jáne ulttyq zańnamalaryńyzǵa saı, demokratııa men erkindik jaǵdaıynda, beıbit ráýishte ótýi barlyq kórshilerińiz ben seriktesterińiz úshin óte mańyzdy. Bul jolǵy prezıdent saılaýy Qazaqstandaǵy memlekettik protsesterdi birshama jandandyryp, Tuńǵysh Prezıdent Nursultan Nazarbaev iske qosqan progressıvtik reformalarǵa tyń serpin berýi múmkin. Bul Qazaqstannyń órkendeýi úshin jańa tynys ashyp, ishki jáne syrtqy baılanysqa óz áserin tıgizedi. Qazaqstan halqy kimdi saılasa da, bul durys tańdaý bolyp, kópultty ári zamanaýı biregeı qoǵam qurý jolyndaǵy jumystar jemisti jalǵasyn tabady» - deıdi P.Onoıko.