Saılaýdy baqylaýda TMD baıqaýshylary qalaı jumys isteıdi

NUR-SULTAN. QazAqparat - Qazaqstanda 9 maýsymda ótetin kezekten tys Prezıdent saılaýynda qandaı da bir buzýshylyqtar anyqtalǵan jaǵdaıda TMD elderinen keletin baıqaýshylar qandaı shara qabyldaıdy? Bul týraly OSK-da ótken baspasóz máslıhatynda TMD Atqarý komıteti - atqarýshy hatshysy tóraǵasynyń birinshi orynbasary Vıktor Gýmınskıı aıtyp berdi, dep habarlaıdy QazAqparat tilshisi.

«Qazaqstanda budan buryn bolǵan saılaýlardy baqylaýǵa buryn men qatysqan joqpyn. Eger belgili bir baıqaýshy qandaı da bir buzýshylyqty anyqtaıtyn bolsa, onda ol kemshilikter týraly tıisti aryz jazý kerek. Al sodan keıin bolǵan faktige qatysty sheshim qabyldanady. Ol aryz prokýratýraǵa jóneltiledi. Bizde shtab endi ǵana qurylýda. Ol shtabtyń jumysyn retteý barysynda Bas prokýratýra, Іshki ister mınıstrligi jáne Joǵarǵy sotpen tıisti jumystardy úılestirip jatyrmyz. Biz baıqaýshylardan túsken qandaı da bir shaǵymdar men buzýshylyqtarǵa qatysty aqparattardyń barlyǵyn jınaımyz. Mıssııanyń qorytyndy málimdemesin daıarlaý kezinde osy materıaldardyń barlyǵyn tirkeımiz. TMD baıqaýshylar mıssııasynyń jumys prıntsıpi - basqa mıssııalardyń jumysyna uqsamaıdy. Biz ne kórdik, sony jazamyz. Sodan keıin osy másele boıynsha resmı organdardan alǵan jaýapty da tirkeımiz», - deıdi ol.

TMD-dan baıqaýshylar mıssııasy Qazaqstandaǵy saılaýdy, onyń ishindegi QR Prezıdentiniiń saılaýyn baıqaýda úlken tájirıbege ıe. TMD-dan 700-den astam baıqaýshylar mıssııasy Qazaqstanda 2015-2016 jyldary ótken eki saılaý naýqanyna qatysqan bolatyn.

Aıta ketsek, budan buryn Vıktor Gýmınskıı Qazaqstandaǵy Prezıdent saılaýyn TMD-dan 300 baıqaýshy baqylaıtynyn málim etken edi.

Eske sala keteıik, QR Prezıdentiniń saılaýy 9 maýsym kúni ótedi. Saılaýǵa 7 kandıdat tirkelip otyr.