Saılaýda múgedekterge kómektesýge stýdentter men volonterlerdi shaqyrý kerek - Berdibek Saparbaev
Bul usynysty QR Eńbek jáne halyqty áleýmettik qorǵaý mınıstri Berdibek Saparbaev Ortalyq saılaý komıssııasynyń keńeıtilgen otyrysynda aıtty.
Mınıstrdiń aıtýynsha, sońǵy 2-3 jylda múmkindigi shekteýli jandardyń daýys berýine jaǵdaı jasaýda mınıstrlik pen Ortalyq saılaý komıssııasy birlesip, eleýli jumystar atqardy.
«Kezekten tys saılaýda barlyq saılaýshylarǵa, onyń ishinde múmkindigi shekteýli azamattarǵa jaǵdaı jasaýymyz kerek. Qazaqstanda 680 myń múmkindigi shekteýli adamdar turady. Odan balalardy jáne sot sheshimimen saılaýǵa qatyspaıtyn azamattardy alyp tastaǵanda, eń kemi 500 myń múgedek saılaýǵa qatysýy kerek. Sonymen birge, 2015 jyly múmkindigi shekteýli jandardyń quqyǵy týraly BUU konventsııasyn maquldadyq, ózimizge halyqaralyq mindet aldyq. Sony oryndaýymyz kerek», - dedi Berdibek Saparbaev.
Mınıstr jergilikti bılik ókilderimen birge, múmkindigi shekteýli azamattardyń janynda kómekshilerdiń, sýroaýdarmashylardyń bolýyn qamtamasyz etýdi usyndy.
«Bizdiń oıymyzsha, jergilikti bılik ókilderi osy jumystarǵa, eriktilerdi, onyń ishinde 3-4 kýrstaǵy JOO stýdentterin paıdalanýy kerek. Eń negizgisi - barlyq 9 950 saılaý ýchaskelerinde bul azamattarǵa jaǵdaı jasalýy kerek. Byltyrdan bastap, bizdiń mınıstrlik janynda ınternet-portal jumys isteıdi. Sol ınternet-portalǵa 30 myńnan astam áleýmettik jáne kólik ınfraqurylymy nysandary engizilgen, oǵan qosymsha 6,5 myńǵa jýyq saılaý ýchaskeleri de engizilgen», - dep atap ótti B. Saparbaev.