Saılaýda merekelik kóńil-kúıdi kórip, el jaǵdaıy jaqsy ekenin ańǵardyq - Italııa baıqaýshysy

NUR-SULTAN. QazAqparat - Italııa elinen kelgen baıqaýshylar elordadaǵy birneshe saılaý ýchaskelerin aralap shyqty, dep habarlaıdy QazAqparat tilshisi.

Italııa Parlamenti spıkeriniń orynbasary Etto Rozatto elordada ótken baspasóz máslıhatynda qazir tańda qazaq halqy mańyzdy kezeńge aıaq basqaly otyrǵanyn málim etti.

«Dál qazir jáne dál osy jerde Qazaqstannyń keleshektegi kóshbasshysy tańdalyp jatyr. Sheteldik baıqaýshylar retinde saılaý barysyn baqylap qaıttyq. Birneshe saılaý ýchaskelerine baryp, halyqpen, sheteldik delegattarmen, tipti prezıdenttikke kandıdattardyń ózimen tildesip úlgerdik. Álbette, saılaý qorytyndysynan habarymyz joq. Alaıda ár saılaý ýchasesindegi uzyn-sonar kezekti kórý - óte jaqsy belgi dep aıtar edim. Bul jaǵdaı osy elde demokratııa jaqsy damyǵanyn kórsetedi», - dedi Etto Rozatto.

Baıqaýshy óz sózinde Qazaqstanmen qarym-qatynasty nyǵaıtýǵa Italııa qashan da múddeli ekenin jetkizdi.

«Qytaı men Reseı arasynda ornalasqan Qazaqstan qazirgi ýaqytta oıly saıasat júrgizip otyr. Saıasattyń osynaý tepe-teńdiginiń mańyzy óte zor», - dedi baıqaýshy.

Italııadan kelgen taǵy bir baıqaýshy, Italııa Respýblıksanyń senatory Antonıo Mızıanı saılaý - Qazaqstan úshin mańyzdy qadamdardyń biri ekenin atap ótti.

«Saılaý joǵary deńgeıde ótip jatyr. Bizdiń oıymyzsha, protses taza uıymdastyrylǵan. Biz barǵan saılaý ýchaskelerinde halyqtyń kóptep kelip jatqanyn kórdik. Halyqtyń kóbi merekelik kóńil kúıde júr. Bul degenimiz halyqtyń jaǵdaıy jaqsy ekenin kórsetedi», - dedi Italııa senatory.

Aıta ketsek, saılaý týraly pikirin osy ýaqytqa deıin Polsha, Rýmynııa, Reseı elderiniń baıqaýshylary bildirgen bolatyn.

Osy ýaqytqa deıin Qazaqstan saılaýshylarynyń 65,9 paıyzy daýys berip úlgerdi.

Eske sala ketsek, búgin Qazaqstan Prezıdentin kezekten tys saılaý protsesi ótip jatyr. QR Prezıdentiniń kezekten tys saılaýynda el ishinde jáne shet elderde 9 968 daýys berý ýchaskesi jumys isteıdi.