Saılaýda memlekettik qurylymnyń jańa modeli iske qosylady – Erlan Qarın

ASTANA. QazAqparat – 20 qarashada ótetin Prezıdent saılaýy eldiń odan ári damý joldary týraly jańa mazmundy qoǵamdyq pikirtalastarǵa serpin berdi. Bul pikirdi Qazaqstan Respýblıkasynyń Memlekettik hatshysy Erlan Qarın bildirdi, dep habarlaıdy QazAqparat.

«Búgin saılaýaldy úgit-nasıhat kezeńi aıaqtalady. Jalpy, prezıdenttik saılaý jarııalanǵan sátten beri saılaý naýqany shamamen úsh aıǵa sozyldy. Bul saılaý eldiń odan ári damý joldary týraly jańa mazmundy qoǵamdyq pikirtalastarǵa serpin berdi. Biraq saılaý naýqanynan bólek, aldaǵy saılaýdyń asa mańyzdy mindetin de umytpaý kerek. Osy jeksenbide naqty bir kandıdatqa daýys berý ǵana júrmeıdi, qazaqstandyqtar maýsym referendýmynda konstıtýtsııalyq kontýrlaryn bekitken memlekettik qurylymnyń jańa, anaǵurlym demokratııalyq modeli iske qosylady», - dep jazdy Erlan Qarın óziniń Telegram paraqshasynda.

Konstıtýtsııalyq reformany zańnamalyq qamtý maqsatynda qabyldanǵan zańdardyń da búgin kúshine enýi sımvoldyq turǵyda mańyzdy.

«Memlekettik ınstıtýttardy qaıta jańǵyrtýdyń kelesi kezeńi – 2023 jyldyń birinshi jartysynda Parlament Májilisi men barlyq deńgeıdegi máslıhattar depýtattarynyń aldaǵy saılaýy bolady. Nátıjesinde jańa, túbegeıli basqa saıası júıe qalyptasady. Osylaısha, 2019 jyldan bastap búgingi kúnge deıin elimizde júrgizilip jatqan barlyq saıası reformalar saıası jańǵyrýdyń biryńǵaı platformasyna jınaqtalady», - deıdi E. Qarın.