Saılaýaldy úgit jumystaryn ınternet arqyly júrgizý rettelmek

ASTANA. QazAqparat - Bas prokýrordyń birinshi orynbasary Ǵızat Nurdáýletov «Qazaqstan Respýblıkasynyń saılaý týraly» zańyna qatysty Ortalyq saılaý komıssııasynyń usynystaryna pikirin bildirdi, dep habarlaıdy «QazAqparat» HAA tilshisi.

«Konstıtýtsııalyq zań úgit-nasıhat jumystarynyń baspasóz nemese teledıdar arqyly berilý tártibin ǵana qadaǵalaıdy. Al qazirgi tańda zańbuzýshylyqtardyń kóbi ınternet arqyly júzege asyrylyp jatyr. Belgili bir adamǵa daýys berý boıynsha pikirge, fotosýretterdi nemese vıdeomaterıaldardy taratýǵa, onlaın daýys berýge qatysty zańnamany ózgertý týrasynda usynystar kelip túsip jatyr», - deıdi ol.

Ǵızat Nurdáýletov sonymen birge, saılaý kezinde prokýrorlardyń jumys kestesin retteý boıynsha da oıyn bildirdi.

«Zań prokýrorlarǵa tolyq qurammen saılaý kúni jumys atqarýǵa mindetteıdi. Bul óz kezeginde demalys kúnder úshin qosymsha ótem tóleýdi talap etedi. Biraq prokýratýrada saılaýǵa múlde qatysy joq bólimsheler de bar. Bıýdjettik qarajatty únemdeý úshin dál osy kúnderi prokýratýra qajettilikti ózi retteıtindeı ózgerister qaralýda», - deıdi Ǵızat Nurdáýletov.

Eske sala ketsek, búgin Astanada Ádilet mınıstri Marat Beketaevtyń tóraǵalymen zań jobalaý qyzmeti máseleleri jónindegi vedomstvoaralyq komıssııanyń kezekti otyrysy ótti. Jıynda OSK tóraǵasynyń orynbasary «QR saılaý týraly» zańyna birqatar ózgeristerdi engizýdi usynǵan bolatyn. Onyń ishinde komıssııa ókili saılaý aldynda ınternet-resýrstarmen jumys júrgizýdi júıeleýdi atap ótti.