Saılaýaldy úgit-nasıxatqa shetel mamandary tartylmaıdy - Toqaevtyń shtaby

NUR-SULTAN. QazAqparat - QR Prezıdenttigine kandıdat Qasym-Jomart Toqaevtyń senimdi ókili, respýblıkalyq qoǵamdyq shtab basshysy Máýlen Áshimbaev saılaýaldy úgit-nasıxatqa sheteldik mamandardyń tartylmaıtynyn málimdedi, dep habarlaıdy QazAqparat tilshisi.

«Qazirgi kezde qoǵamdyq shtabqa shetelden saıası texnologııalar boıynsha mamandardy tartýǵa qatysty suraqtar bolyp jatyr. Osy másele boıynsha meniń aıtatynym, bizdiń respýblıkalyq qoǵamdyq shtabymyz shetelden arnaıy mamandardy tartqan joq. Qazaqstannyń ózinde mamandar bar. Áleýmettanýshylar, saıası sala mamandary, jýrnalıster - bári bilimdi mamandar. Sondyqtan biz shtabtyń jumysyna osyndaı azamattardy tartyp jatyrmyz. Óıtkeni qazirgi zamanda árbir máseleniń óziniń texnologııalary men tetikterin paıdalaný kerek. Shetelden eshkimdi shaqyrǵan joqpyz. Ózimizdiń mamandarymyzdy tartyp, olarmen birge jumys jasap jatyrmyz», - dedi M.Áshimbaev jýrnalısterge bergen suxbatynda.

Onyń aıtýynsha, QR Prezıdenttigine kandıdat Qasym-Jomart Toqaevtyń saılaýaldy baǵdarlamasy daıyn. Búginde atalǵan qujattyń keıbir tustary pysyqtalyp jatyr.

«Biz kandıdatymyzdyń saılaýaldy baǵdarlamasy boıynsha negizgi tezısterdi 11 mamyrda jarııalaımyz. Oǵan deıin úgit-nasıxat jumystaryn júrgizýge bolmaıdy. Sol sebepti 11 mamyrda saǵat 18:00-den bastap úgit-nasıxatty bastap, Qasym-Jomart Kemeluly Toqaevtyń saılaýaldy baǵdarlamasyn da tanystyratyn bolamyz», - dep atap kórsetti M.Áshimbaev.

Aıta keteıik, elordada QR Prezıdenttigine kandıdat Qasym-Jomart Toqaevtyń respýblıkalyq qoǵamdyq shtaby quryldy. Budan bólek, úgit-nasıxat sharalary kezinde qalalyq, oblystyq jáne aýdandyq shtabtar jumys isteıtin bolady. Búgin «Nur Otan» partııasy Tóraǵasynyń orynbasary Máýlen Áshimbaev respýblıkalyq shtabqa kimderdiń kirgenin aıtyp berdi.

Shtab áleýmettik jelilerge úlken basymdyq beretin bolady.