Saılaýaldy naýqanda qandaı zańbuzýshylyqtar jıi tirkeldi

ASTANA. QazAqparat – Elimizdiń Bas prokýratýrasy saılaýaldy úgit-nasıhat naýqany kezinde bolǵan zańbuzýshylyq faktileri týraly málimet berdi, dep habarlaıdy QazAqparat tilshisi.

«Saılaýaldy naýqan kezinde Saılaý zańnamasynyń normalaryn buzýǵa jol berildi. Ol boıynsha 23 fakti tirkeldi. Búginde barlyq fakti tekserilip, kináliler ákimshilik jazaǵa tartyldy. Eń kóp zańbuzýshylyqtar tyıym salynǵan kezde úgit-nasıhat júrgizý. Ol boıynsha 12 fakti tirkeldi. 6 jaǵdaıda 3 zańdy tulǵa jáne 3 kandıdat emes azamat quqyq buzdy. Basqa 6 jaǵdaıda bir mandatty okrýgter boıynsha tirkelgen Májilis depýtattyǵyna kandıdattar tirkeý merzimi aıaqtalǵanǵa deıin zańsyz úgit júrgizgen», - dedi Bas prokýrordyń orynbasary Jandos Ómirálıev Ortalyq saılaý komıssııasy otyrysy barysynda.

Onyń aıtýynsha, Bas prokýratýra zańbuzýshylardy jaýapqa tartý boıynsha Ortalyq saılaý komıssııasynyń kelisimin alǵan.

«Sot kinálilerge aıyppul salǵannan keıin Ákimshilik quqyqbuzýshylyq týraly kodekstiń 102-baby boıynsha kandıdattar tirkeýden alyndy. Bul zań talaby. Almatyǵa taǵy bir kandıdat ákimshilik quqyqbuzýshylyq 122-baby boıynsha jaýapqa tartyldy. Ol saılaýaldy úgit-nasıhat júrgizý sharttaryn buzyp, azamattarǵa taksı qyzmetin tegin kórsetken. Ol kinásin moıyndap, tirkeýden alyndy», -deıdi ol.

Buǵan deıin Májilis pen máslıhattar depýtattyǵyna kandıdattar sotqa 166 aryz túsirgeni týraly habarlaǵan edik. https://kaz.inform.kz/news/mazhilis-pen-maslihattar-deputattygyna-kandidattar-sotka-166-aryz-tusirgen_a4046889