Saılaý júıesin jetildiretin zań jobasy talqylaýǵa shyǵaryldy
Zań jobasy kóptegen ózgerister men túzetýlerdi engizýge baǵyttalǵan. Sonyń ishinde saılaýǵa kandıdatýrasyn usyna almaıtyn azamattardyń qataryna aýyr qylmys istegender de kiretini aıtylǵan.
— Sondaı-aq aýyr, asa aýyr qylmys jasaýdaǵy kinásin sot zańda belgilengen tártippen tanyǵan adam QR Prezıdenttigine, QR Parlamentiniń, máslıhattardyń depýtattyǵyna, ákim bolýǵa kandıdat, sondaı-aq ózge de jergilikti ózin-ózi basqarý organdary músheligine kandıdat bola almaıdy, — dep jazylǵan qujatta.
Al zańnyń 19-babyna saılaý komıssııasynyń múshesi bola almaıtyn azamattardyń qataryn tolyqtyrǵan tarmaqsha engizilmek.
— Sybaılas jemqorlyq qylmys jáne sybaılas jemqorlyq quqyq buzýshylyq, aýyr, asa aýyr qylmys jasaýdaǵy kinásin sot zańda belgilengen tártippen tanyǵan adam saılaý komıssııasynyń múshesi bola almaıdy, — delingen.
Saılaý qoryna bólinetin aqshany aýdaratyn bankti Ortalyq saılaý komıssııasy aıqyndaıtyn norma da usynylyp otyr.
— Saılaý qoryn quraıtyn aqsha qarajaty kandıdat, partııalyq tizim tirkelgennen keıin tıisti saılaý komıssııasynyń jazbasha aqparaty negizinde Ortalyq saılaý komıssııasy aıqyndaǵan bankterde ashylatyn arnaýly ýaqytsha shottarǵa aýdarylady, — delingen qaýly zań jobasynda.
50-baptyń 11-1 tarmaqshasynda saılaý aldyndaǵy pikirsaıystardy ótkizý tártibi men sharttaryn buzý jaýaptylyq júkteletini aıtylǵan.
— Onlaın-platformalarda aldyn ala saılaý aldyndaǵy pikirsaıystardy ótkizý quqyǵyn uıymdastyrýshylar men paıdalanýshylarǵa berýine baılanysty, pikirsaıystardy ótkizý tártibi men sharttaryn buzǵany úshin jaýapkershilik belgileý usynylady, — dep jazylǵan túsindirmede.
94-baptaǵy Májilisi depýtattarynyń saılaýynda daýystardy sanaý tártibine qosymsha norma enshizilmek.
— Ýchaskelik saılaý komıssııalary hattamalarynyń negizinde tıisti aýmaqtyq saılaý komıssııalary daýys berý nátıjeleri týraly hattama jasaıdy. Oǵan komıssııa tóraǵasy men músheleri qol qoıady jáne daýys berý kúninen bastap eki kúnnen aspaıtyn merzimde tıisti aýmaqtyq nemese okrýgtik saılaý komıssııalaryna jiberiledi, — delingen zań jobasynda.
Sonymen qatar, zań jobasynda bir adam bir mezgilde Májilis pen Máslıhattyń birmandattyq okrýgterine kandıdatýrasyn usyna almaıtyny naqtylanǵan norma bar.
— Ótken saılaýda Parlament Májilisi men máslıhattarǵa bir úmitker usynyldy. Bul kandıdat Parlament Májilisi men máslıhat saılaýynda jeńiske jetse, saılaýdyń biri ótpeı qalýyna ákelýi múmkin, — dep jazady qujat avtorlary.
Eske salsaq, Memleket basshysy Qasym-Jomart Toqaev «Ana tili» gazetine bergen suhbatynda kezekten tys Prezıdent saılaýy ótedi degen qaýesetke qatysty pikir bildirgen edi.