Saılaý jarnasyna qajetti qarjy jınaı almaǵan M.Eleýsizov saıası dodaǵa qatysýdan bas tartty
10:17, 17 Naýryz 2015
ASTANA. QazAqparat - Búgin «Tabıǵat» ekologııalyq odaǵynyń basshysy Mels Eleýsizov QR Ortalyq saılaý komıssııasyna prezıdenttik saılaýǵa úmitker retinde bergen ótinishin qaıtaryp aldy.
«Men saılaý naýqanynan bas tartý týraly sheshim qabyldadym. Sondyqtan kezekten tys prezıdenttik saılaýǵa túsý úshin bergen kandıdatýramdy alyp tastaý týraly ótinish berdim», - dedi ol.
M.Eleýsizovtiń atap ótýinshe, mundaı sheshim qabyldaýǵa eń birinshi kezekte saılaý jarnasyna qajetti 1 mln. 60 myń teńgeni jınaı almaýy túrtki bolǵan.
«Men saılaý naýqanyn júrgizýge qajetti qarjyny qalǵan ýaqyt ishinde taba almadym. Bul qomaqty qarjy. Ekinshiden, qalǵan sanaýly kúnderdiń ishinde kandıdat retinde tirkelý úshin qajetti qoldaý qolyn jınaı almaımyn. Sondyqtan da eshkimdi áýre-sarsańǵa salmaı, kandıdatýramdy alyp tastaý týraly ótinish berdim», - dedi ol.