Saılaý: Jalpyulttyq sotsıal-demokratııalyq partııa tóralqasy málimdeme jasady

ASTANA. QazAqparat – 19 naýryzda ótetin Májilis depýtattarynyń kezekten tys saılaýyna oraı, Jalpyulttyq sotsıal-demokratııalyq partııasynyń tóralqasy málimdeme jasady, dep habarlaıdy QazAqparat partııa saıtyna silteme jasap.

«Biz, Jalpyulttyq sotsıal-demokratııalyq partııa – elimizdegi saıası ózgerister úshin kúresýge daıyn jalǵyz oppozıtsııalyq kúshpiz. Ótken parlamenttik saılaý naýqanynda daýys berýdiń ádil ótýine kúmán keltirip, óz kandıdattarymyzdy usynbaı, saılaýǵa boıkot jarııalaýdy sheshtik. Endi jaǵdaı ózgerdi, zańnamalyq sharttar men bılik júıesiniń ózi ózgerdi. Sondyqtan da, elimizdiń bolashaǵy aldyndaǵy jaýapkershilikti túsine otyryp, bizdiń partııa aldaǵy saılaý naýqanyna qatysý týraly sheshimin qabyldady.

Biz saılaýǵa qoǵamda jyldar boıy jıylǵan máselelerdi sheshý, azamattardyń quqyqtaryn keńeıtý jáne saıası júıeni demokratııalandyrý maqsatynda qatysamyz», - delingen málimdemede.

Aıta ketsek, keshe «AMANAT», «Aq jol» jáne «Qazaqstan halyq partııasy» da úndeý jarııalaǵan bolatyn. Sondaı-aq, «Aýyl» partııasynyń tóraǵasy da málimdeme jasady.

Eske salsaq, 19 qańtarda Memleket basshysy jetinshi saılanǵan QR Parlamentiniń Májilisin taratý jáne QR Parlamenti Májilisi depýtattarynyń kezekten tys saılaýyn taǵaıyndaý týraly Jarlyqqa qol qoıdy.

Májilis depýtattaryn kezekten tys saılaý 19 naýryzǵa belgilendi.

Sondaı-aq, Memleket basshysy barlyq deńgeıdegi máslıhattardyń ókilettigin toqtatý týraly Jarlyqqa qol qoıdy.

Memleket basshysy Qasym-Jomart Toqaev Parlament Májilisi jáne máslıhat depýtattarynyń kezekten tys saılaýyn taǵaıyndaý týraly málimdeme jasady.

Foto: osdp.kz