Saılaý zańnamasynyń buzylýy týraly túsetin aryz bes kún ishinde, al daýys berý kúni túsken aryz dereý qaralýǵa tıis - Q. Mámı
Keńeste sot júıesi jumysynyń birqatar tájirıbelik máseleleri qaraldy. Kún tártibindegi alǵashqy másele Qazaq handyǵynyń 550 jyldyǵyn merekeleýge oraı ótkiziletin óńirlik konferentsııalarǵa ázirlik barysyna arnaldy.
Q. Mámı konferentsııa uıymdastyrýshylarynyń nazaryn Qazaq handyǵynyń qurylý kezeńindegi quqyqtyq júıe men bıler sotynyń qalyptasý máselelerin, sondaı-aq halyqtyń jáne eldiń múddesin qorǵaýdaǵy bılerdiń rólin tereńirek talqylaý qajettiligine aýdardy. Osy másele boıynsha Qyzylorda, Ońtústik Qazaqstan, Aqmola, Shyǵys Qazaqstan oblystyq sottary men Almaty qalasy soty tóraǵalarynyń baıandamalary tyńdaldy.
Keńeste qaralǵan ekinshi másele Qazaqstan Respýblıkasy Prezıdentiniń kezekten tys saılaýyn ótkizý kezeńindegi sottardyń jumysyna arnaldy. «Ótkiziletin is-sharanyń áleýmettik jáne saıası mańyzdylyǵyn eskere otyryp, saılaý kezeńinde azamattardyń ótinishteri men aryzdaryn qaraýda, materıaldyq jáne protsestik quqyq normalaryna sáıkes zańdy ári negizdelgen sheshimder shyǵarýdy qamtamasyz etýde óte muqııat bolýlaryńyzdy suraımyn», - dedi óz sózinde Q. Mámı.
Sonymen qatar, ol «Saılaý zańnamasynyń buzylýy týraly sottarǵa kelip túsetin aryz bes kún merzimde, al daýys berý kúninen bes kún buryn jáne daýys berý kúni túsken aryz dereý qaralýǵa tıis» ekendigin eske salyp ótti.
Odan ári selektorlyq keńeste Qazaqstan halqy Assambleıasynyń 20 jyldyǵy men Uly Otan soǵysyndaǵy Jeńistiń 70 jyldyǵyn merekeleýge arnalǵan is-sharalardy uıymdastyrý jáne ótkizý máseleleri qaraldy. «Memleket basshysynyń kóregen jáne salıqaly saıasatynyń arqasynda qazaqstandyq sýdıalar qaýymdastyǵynda etnosaralyq jáne konfessııaaralyq shıelenisterge jol bermeıtin aıryqsha tolerantty áleýmettik-mádenı orta qalyptasty, buǵan sot júıesinde jumys isteıtin 28 etnostyń ókilderi dálel bolyp tabylady», - dep atap ótti Q.Mámı.
Keńes barysynda jergilikti sottardyń tóraǵalary atalǵan mereıtoılyq datalardy merekeleýge ázirlik barysy týraly baıandady. Atap aıtqanda, qazirgi tańda sottar Uly Otan soǵysynyń, tyl eńbekkerleriniń jáne sot júıesiniń ardagerleri úshin túrli merekelik is-sharalar ótkizýde, sondaı-aq «Ardaǵym - ardagerim» atty qaıyrymdylyq aktsııasy iske asyrylýda.
Buǵan qosa, Q. Mámı Uly Otan soǵysynyń ardagerlerine, sot júıesiniń qyzmetkerlerine qarjylyq jáne ataýly áleýmettik kómek kórsetý múmkindigin qarastyrýdy tapsyrdy.
Joǵarǵy Sot Tóraǵasy jergilikti jerlerde ótýi kózdelgen barlyq is-sharalardy joǵary uıymdastyrýshylyq deńgeıde jáne saltanatty jaǵdaıda uıymdastyrýy qajettigine toqtaldy.
Búgingi tańda respýblıka sottary aǵymdaǵy jyldyń alǵashqy toqsanynyń eseptik kezeńinde qylmystyq jáne qylmystyq-protsestik zańnamalardyń jańartylýy jaǵdaıynda jumys istedi. Atalǵan zańdardyń tujyrymdamalyq jańa redaktsııalary azamattardyń konstıtýtsııalyq quqyqtaryn neǵurlym tıimdi qorǵaýmen baılanysty. Bul jumystyń alǵashqy nátıjeleri de joq emes, belgili bir sot tájirıbesi qalyptasty, túıtkildi máseleler aıqyndaldy. Sottardyń kodeksterdi qoldanýymen baılanysty, sonyń ishinde tergeý sýdıalarynyń jumysy týraly Joǵarǵy Sottyń qylmystyq ister jónindegi qadaǵalaýshy sot alqasynyń tóraǵasy A. Rahmetýlın toqtalyp ótti.
Selektorlyq keńeste «Tórelik» júıesindegi Іs sanattarynyń biryńǵaı jiktegishin qalyptastyrýdyń barysy talqylandy. Atalǵan másele boıynsha Joǵarǵy Sot janyndaǵy Sottardyń qyzmetin qamtamasyz etý departamentiniń basshysy І. Ispanov baıandady.
Selektorlyq keńesti qorytyndylaı kele, Q. Mámı sot korpýsynyń aldyna azamattardyń quqyqtary men zańdy múddelerin sotta qorǵaýdyń sapasyn arttyrý baǵytyndaǵy júıeli sharalardy iske asyrý boıynsha birqatar tapsyrmalar berdi.