Saılaý ýchaskeleri qandaı jaǵdaıda erte jabylýy múmkin

ALMATY. QazAqparat - 19 naýryz kúni almatylyqtar megapolıstiń barlyq segiz aýdanynda birkelki ornalasqan 602 saılaý ýchaskesinde daýys bere alady. Bul týraly Óńirlik kommýnıkatsııalar qyzmetinde ótken brıfıngide Almaty qalalyq aýmaqtyq saılaý komıssııasynyń tóraǵasy Aıgúl Qalyqova málim etti, dep habarlaıdy QazAqparat tilshisi.

Aıtýynsha, Túrksib aýdanyndaǵy № 440 (QR UQK Shekara qyzmetiniń Almaty oblysy boıynsha departamentiniń áskerı bóliminde ornalasqan) bir saılaý ýchaskesi daýys berýshilerdiń sol jerde bolmaýyna baılanysty jumys istemeıdi. Tıisti sheshimdi bólimshe komandıriniń ótinishi negizinde aýdandyq aýmaqtyq saılaý komıssııasy qabyldady.

«Barlyq saılaý ýchaskelerinde daýys berý jáshikteri bar, daýys berý kabınalary da jetkilikti. Sondaı-aq jıhazdarmen, qajetti tehnıka, keńse taýarlarymen jabdyqtalǵan. Ýchaskelerde múmkindigi shekteýli jandarǵa arnalǵan oryndar daıyndaldy. Kózi nashar kóretin saılaýshylarǵa aýdıomaterıaldar men trafaretter ázirlendi. Barlyǵy 602 saılaý ýchaskesi bar», - dedi Aıgúl Qalyqova.

Sonymen qatar ol daýys berýge arnalǵan ǵımarattar qajetti aqparattyq materıaldarmen jabdyqtalǵanyn atap ótti. №3 saılaý okrýgi boıynsha Parlament Májilisiniń depýtattaryna qatysty aqparattyq materıaldardyń bir bóligi búgin keshke deıin osy okrýgtegi saılaý ýchaskeleriniń stendterinde ornalastyrylady.
«70 saılaý ýchaskesinde tizimge engizilgen saılaýshylardyń bári óz tańdaýyn jasap bolsa, daýys berý kez kelgen ýaqytta aıaqtalýy múmkin. Olar Konstıtýtsııalyq zańnyń 38-babynyń 3-tarmaǵyna sáıkes medıtsınalyq mekemelerdegi, áskerı bólimderdegi saılaý ýchaskeleri»,- dedi spıker.
Sondaı-aq Almatynyń 7 saılaý ýchaskesinde (áskerı bólimsheler) daýys berý tańǵy saǵat 6:00-de bastalady.