Saılaý: TMD baıqaýshylar mıssııasy 21 qarashada qorytyndy málimdeme jasaıdy

ASTANA. QazAqparat – 20 qarashada ótetin kezekten tys prezıdent saılaýyna TMD elderinen 23 baıqaýshy akkredıtatsııa aldy. Bul týraly TMD Atqarýshy komıteti tóraǵasynyń – atqarýshy hatshysynyń orynbasary Ilhom Nematov aıtty, dep habarlaıdy QazAqparat tilshisi.

«Jumysymyz ashyqtyqqa, demokratııalyqqa, beıtaraptyqqa, Qazaqstannyń ishki isterine aralaspaýǵa, halyqaralyq quqyqtyń negizgi normalary men ustanymdaryn saqtaýǵa negizdelgen. Bizdiń baıqaýshy tájirıbemiz bar.

Baıqaý shynaıy ótetindigine senimim mol. Qorytyndy málimdeme jasaımyz. Baıqaýshylar toptarynyń barlyq jetekshileriniń qatysýymen úılestirý keńesin quramyz. Daýys berý aıaqtalǵannan keıin, 21 qarashada qorytyndy qujatymyzdy jarııa etemiz. Málimdememiz qysqa merzimdi jáne uzaq merzimdi baıqaýshylardyń baıqaý nátıjelerine ǵana negizdeletin bolady», - dedi Ilhom Nematov Ortalyq saılaý komıssııasynda ótken brıfıngide.

Onyń atap ótýinshe, elimizdegi saılaýǵa TMD elderinen qatysatyn 100-den astam baıqaýshynyń 23-i búginde akkredıtatsııa alyp úlgergen. Mıssııa quramyna TMD-niń barlyq eliniń ókili, TMD Parlamentaralyq Assambleıasynyń, Reseı-Belarýs odaqtas memleketiniń Parlamenttik Assambleıasynyń ókilderi, Astanada akkredıttelgen dıplomattar jáne TMD Atqarýshy komıtetiniń qyzmetkerleri kiredi.