Saılaý tehnıkalyq turǵyda saýatty ári uıymshyldyqpen ótti - baıqaýshy pikiri

ASTANA. QazAqparat - QR Prezıdentiniń kezekten tys saılaýy tehnıkalyq turǵyda saýatty ári uıymshyldyqpen ótti. Bul pikirdi búgin QR Ortalyq saılaý komıssııasynda ótken brıfıngte TMD baıqaýshylary mıssııasynyń ókili Georgıı Federov bildirdi.

«Biz Astana mańyndaǵy úsh eldi mekende boldyq. Saılaý ýchaskeleri der ýaqytynda ashyldy. Biz baıqaýshylarmen, saılaý komıssııalarynyń ókilderimen jáne qarapaıym azamattarmen tildestik. Tehnıkalyq turǵydan alyp qaraǵanda saılaý óte saýatty ári uıymshyldyqpen ótkizildi», - dedi ol.

G.Federov sonymen qatar óz sózinde tańerteńnen daýys berýge kelgen saılaýshylardyń qarasy kóp bolǵanyn erekshe atap ótti.

«Sondaı-aq biz saılaý komıssııalary ókilderiniń daıyndyqtaryn tekserdik. Jalpy, azamattardyń daýys berý quqyǵyn shekteıtindeı eshqandaı zań buzýshylyq oryn almady», - dedi sheteldik baıqaýshy.