Saılaý: SQO-da 386 myńǵa jýyq adam daýys berýge quqyly

PETROPAVL. QazAqparat – Soltústik Qazaqstan oblysynda 655 saılaý komıssııasy anyqtalyp, saılaýshylar tizimine 386 myńǵa jýyq adam tirkeldi. Óńirdiń saılaý naýqanyna ázirligin jumys saparymen kelgen QR Ortalyq saılaý komıssııasynyń tóraǵasy Nurlan Ábdirov kórdi, dep habarlaıdy QazAqparat tilshisi.

Soltústik Qazaqstan – QR Ortalyq saılaý komıssııasynyń tóraǵasy Nurlan Ábdirov kelgen 14-shi óńir. Ol ár oblysty aralap, ýchaskelik saılaý komıssııalarynyń múshelerimen kezdesip, jyldyń basty saıası naýqany – prezıdent saılaýyna ázirligin pysyqtaýda. Óıtkeni Ortalyq jáne barlyq jergilikti saılaý komıssııalarynyń mindeti – saılaý quqyǵy bar saılaýshylarǵa óz daýysyn berýge jaǵdaı jasaý, saılaýdyń ashyq, ádil jáne Qazaqstan zańnamasyna saı ótýin qamtamasyz etý.

«Bizdiń kezdesýimiz prezıdent saılaýy aıasynda ótip jatyr. Ortalyq saılaý komıssııasy eshqandaı úgit-nasıhat jumysyn júrgizbeıdi. Ol bizdiń quzyretimizge jatpaıdy, tipti ol zańǵa qaıshylyq bolady. Sol sebepti bizdiń negizgi maqsatymyz – óńir aralap, saılaý ınfraqurylymy, saılaýaldy kezeńde qazir qanshalyqty tıimdi óz mindetterin atqaryp jatyr, jergilikti halyq qanshalyqty habardar, qatysý yntasy qandaı ekenin bilip qaıtý.

Eki ýchaskeni aralap kórdim, sol jerdegi ýchaskelik komıssııa músheleriniń qanshalyqty daıyn ekenin bilip, olardyń suraqtaryna jaýap berdim. Osy kezdesýden keıin arnaıy oqytý-jattyǵý bolady», - dedi Nurlan Ábdirov.

Óńir basshysynyń birinshi orynbasary Marat Tasmaǵanbetovtyń aıtýynsha, SQO-da 385 672 adam saılaýshy retinde tizimge alyndy. Búginde 15 aýmaqtyq, 640 ýchaskelik, barlyǵy 655 saılaý komıssııasy bar. Olar materıaldyq-tehnıkalyq jaǵynan 100 % qamtylǵan. Ýchaskelerdiń talapqa saı bolýy tekserildi.

«Saılaýshylar ózderiniń qaı saılaý ýchaskesinde daýys beretinin jáne tizimde bar-joǵyn arnaıy iske qosylǵan servıs arqyly bile alady. Ol úshin bar bolǵany IIN-di engizý qajet. Ol aýdandyq jáne qala ákimdiginiń saıttarynda qoljetimdi. Sondaı-aq SailauSko atty Telegram-bot bar, 13 aýdanda jáne Petropavlda Call-ortalyq ashylǵan. Turǵyndarǵa yńǵaıly bolýy úshin táýlik boıy jumys isteıtin «iKOMEK109» biryńǵaı baılanys ortalyǵynda Call-ortalyq jumys isteıdi. Petropavl qalasynda jáne aýdan ortalyqtarynda ornalasqan 147 saılaý ýchaskesinde tirkeýdi tekserýge bolatyn onlaın servıs jumys istemek. Bul sharalar ár azamattyń konstıtýtsııalyq quqyǵyn paıdalanýyna múmkindik beredi», - deıdi Marat Tasmaǵanbetov.

Al múgedektigi bar adamdarǵa saılaý kúni óńirde 2 ınvataksı jáne 6 áleýmettik taksı jumys istemek.