Saılaý naýqany qalaı uıymdastyrylatynyn aıtý ázirge erte - Máýlen Áshimbaev

NUR-SULTAN. QazAqparat – Saılaý naýqanyna qatysty sheshimdi Memleket basshysy ózi qabyldaıdy. Bul týraly Senat tóraǵasy Máýlen Áshimbaev málim etti, dep habarlaıdy QazAqparat tilshisi.

«2019 jyly Qasym-Jomart Kemelulynyń saılaý aldyndaǵy shtabyn basqarǵan edim. Ol kezde Nur Otan partııasy tóraǵasynyń birinshi orynbasary qyzmetinde boldym. Qazir bul partııa AMANAT dep atalady. Sol kezde partııa Prezıdenttikke Qasym-Jomart Toqaevty kandıdat retinde usyndy», - dedi M. Áshimbaev Senattyń jalpy otyrysynan keıin tilshiler saýalyna jaýap bere otyryp.

Onyń sózine qaraǵanda, osy joly saılaý naýqany qalaı uıymdastyrylatynyn aıtý ázirge erte.

«Barlyq sheshimdi Memleket basshysy ózi qabyldaıdy. Prezıdenttik saılaýdyń resmı málimdemesi jarııalanbady. Bizde merzim men kúntizbelik jospar da joq. Sondyqtan qazir qandaı da bir jormaldy aıtýǵa erte dep oılaımyn. Jalpy, bul jaǵdaıǵa qatysty Memleket basshysy ózi sheshim jasaıdy», - dedi Senat tóraǵasy.

Budan buryn habarlanǵandaı, Senat tóraǵasy aldaǵy saılaýda Parlamentke, Úkimetke jańa adamdardyń kelýine múmkindik bolatynyn aıtty.

Onyń paıymynsha, 7 jyldyq prezıdenttik mandat saılaý aldyndaǵy baǵdarlamany júzege asyrýǵa, halyqqa bergen ýádeni oryndaýǵa jetkilikti.