Saılaý nátıjesi referendýmnyń bekerden týyndamaǵanyn aıǵaqtaıdy

ANA. 6 sáýir. QazAqparat /Qanat Mámetqazyuly/ - Elimiz úshin aǵymdaǵy jyldyń eń mańyzdy saıası oqıǵasy 3 sáýirde óz máresine jetti. Kúni keshe ótken saıası doda - QR Prezıdentiniń kezekten tys saılaýynda halyq óz tańdaýyn jasady.

Sóıtip Barys jyly bastalysymen shyǵys óńirinen bastaý alyp, qoǵamdaǵy qyzý pikirtalasqa arqaý bolǵan «referendým máselesine» sońǵy núkte saılaý arqyly qoıyldy. Bul saılaý Elbasy ókilettigin referendým arqyly uzartý jónindegi bastamanyń bekerden týyndamaǵanyn aıǵaqtap berdi.

Keshe, 5 sáýir kúni QR Ortalyq saılaý komıssııasynyń saılaýdyń resmı qorytyndysyn shyǵaryp, 2011 jyldyń 3 sáýirinde ótken QR Prezıdentiniń kezekten tys saılaýynda Memleket basshysy Nursultan Nazarbaev saılaýshylardyń 95,55 paıyz daýysyn jınap, jeńiske jetkenin jarııalady. Resmı málimetter boıynsha saılaýǵa 8 mıllıon 279 myń 676 saılaýshy qatysqan. Bul daýys berýge quqy bar azamattardyń 89, 99 paıyzy. Tańdaý jasaǵan saılaýshylardyń 7 mln. 850 myń 958-i Nursultan Nazarbaevty jaqtap, daýys bergen. Al Prezıdent laýazymyna talasqan Qazaqstannyń Kommýnıstik halyqtyq partııasynyń hatshysy Jambyl Ahmetbekovti saılaýshylardyń 1,36 paıyzy nemese 111 myń 924 adam, «Tabıǵat» ekologııalyq odaǵynyń tóraǵasy Mels Eleýsizovti - 1,15 paıyzy nemese 94 myń 452 adam, al Qazaqstan Patrıottary partııasynyń tóraǵasy, Senat depýtaty Ǵanı Qasymovty- 1,94 paıyzy nemese 159 myń 036 adam jaqtaǵan.

QR Ortalyq saılaý komıssııasynyń málimetinshe, elimizde saılaýshylardyń tizimine 9 mıllıon 200 myń 298 adam engizilgen. Saılaýshylar respýblıkadaǵy 9 myń 725 saılaý ýchaskelerinde daýys berdi. Sonymen qatar tysqary jerlerdegi elimizdiń azamattary Qazaqstannyń shet memleketterdegi dıplomatııalyq ókildikteriniń janynan qurylǵan saılaý ýchaskelerine baryp, óz tańdaýlaryn jasady. QR Prezıdentiniń kezekten tys saılaýyn 1059 sheteldik jáne halyqaralyq uıymdardyń baıqaýshylary men Syrtqy ister mınıstrliginde tirkelgen 200-den astam buqaralyq aqparat quraldarynyń ókilderi baqylady.

Sóıtip, Prezıdenttiń óz sózimen aıtqanda «Qazaqstan halqy taǵy bir tarıhı belesti attap otyr». Áýelden-aq sáýegeı saıasatkerler Іs-basyndaǵy Prezıdenttiń tuǵyry bıik ekendigin aıtyp, tipti elektorat daýysynyń bóliner mólsherlerin de kesip-piship edi. Túpki nátıje sol boljaǵyshtar aıtqan tóńirekten alystaǵan joq. Sondyqtan da «dúıim jurt aldynda Qazaqstan halqy birligin saqtaı alatyn el ekendigin kórsetti, óz bolashaqtaryn betburǵan el belsendilik tanytty» degen pikirler «syrt kóz synshy» atalatyn taraptan shyqqan-dy. Bundaı pikirlerge sál keıinirek oralamyz, ázirshe saılaýdyń qalaı ótkenine toqtalsaq

Yń-shyńsyz saılaý!

3 sáýirde tańsáriden daýys berý ýchaskeleriniń esigi aıqara ashylyp, árkim óz jumysyna kiriskende sheteldik baıqaýshylar da syrttan baqylaıtyn mıssııasyna mingen edi. Saılaý kúni meıram kúni sekildi belsendiliktiń bolǵanyn eń alǵash moıyndaǵandar da sol shetten baqylaǵandar boldy. Baspasóz máslıhattarynda naýqannyń uıymdastyrý deńgeıiniń joǵarylyǵyna, kemshiliktiń tómendigine de nazar aýdartty sheteldik baıqaýshylar. Olardyń birazy sol kúni saǵat 11-den bastap BAQ ókilderimen kez­desip, saılaý barysy týraly alǵashqy pikirlerimen bólisse, negizgi bóligi ózderinde bekitilgen erejege sáıkes, ertesinde, ıaǵnı 4 sáýir kúni baqylaý qorytyndy­laryn jarysa jarııalady. Sheteldik baı­qaý­shylardyń basym bóligi saılaýdyń ádil, ashyq ári halyqaratyq talaptar men ulttyq zańnamaǵa saı ótkendigin málimdedi. Al saǵat saıyn saılaýshylar sanyn qaıta-qaıta jańǵyrtyp, jańa málimetter usynǵan Ortalyq saılaý komıssııasy kúni boıǵy sharany qorytyndylap, aldyn ala málimetterin túnge qarata jarııalaǵanda belsendiliktiń joǵary kórsetkishke ıe bolǵanyn uqtyrǵan bolatyn.

Saılaý kúni QR Prezıdenti Nursultan Ábishuly Nazarbaev elordadaǵy Ulttyq akademııalyq kitaphanada ornalasqan №182-shi saılaý ýchaskesine jubaıy, eli­miz­diń birinshi hanymy Sara Nazarbaevamen birge kelip, daýys berdi. Bunda da azamattar uzyn-sonar kezekte turyp, daýys berip jatty. Tipti, TMD mıssııasymen kelgen kórshiles elderdiń halyqaralyq baıqaýshylary álgindeı kezekke turyp daýys berýdi Keńes odaǵy kezindegi ýaqyttan beri kórmegenderin aıtyp, «qazaqtarǵa rızashylyqpen qaraıtynyn» jetkizgen-di. Toqtala ketetin jaıt, sol kúni daýys bergennen keıin buqaralyq aqparat quraldarynyń ókilde­rimen bolǵan brıfıngte N.Na­zarbaev Qa­zaqstannyń taǵy bir tarıhı sátti basy­nan ótkerip otyrǵandyǵyn atap kórsetti. «Biz óz bolashaǵymyzdy tańdaý ústindemiz. Búkil álemniń nazary Qazaqstandaǵy kezekten tys prezıdenttik saılaýǵa aýyp otyr. Tá­ýel­sizdigimizdiń 20 jyldyǵy qarsańynda ótip otyrǵan Qazaqstandaǵy osy saılaýdyń tarıhı máni óte joǵary. Biz buǵan deıin de kóp jumys atqardyq. Alaıda aldy­myz­da odan da mańyzdy sharalar kútip tur. Endigi kúni qoǵam men memleketimizdi jańǵyrtý maq­satynda aýqymdy jumystar atqaryl­maq», - dedi Prezıdent. Sonymen qatar Memleket bas­shysy kezekten tys saılaýdyń ereksheli­gine toqtala otyryp, kandıdat­tarǵa teńdeı múmkindik jasalǵanyn, olar­dyń BAQ-ta óz ustanymdaryn halyqqa jetkizý úshin barynsha jaǵdaılar qamtyl­ǵanyn atap ótti. Budan bólek, Elbasy Qazaqstannyń qoǵamǵa ashyq ekendigin, bul rette Ortalyq saılaý komıssııasy 1059 baıqaýshyny, 200-den astam sheteldik jýrnalısterdi tirkegenin aıtty. «Minekı, osyndaı ashyq ári zańdy atmosferada elimizde ashyq saılaý ótip jatyr. Búgin barlyq qazaqstandyqtar daýys berýge otbasylarymen, ujymdary­men, top-tobymen kelýde. Men osyndaı belsendilik úshin rızamyn. Barlyǵymyz birge bizdiń qoǵamnyń turaqtylyǵy úshin, kópultty elimizdiń dostyǵy úshin, bolasha­ǵymyz úshin, balalarymyzdyń bolashaǵy úshin, áleýmettik jańǵyrý úshin, bizdiń azamat­tarymyzdyń jaqsaryp kele jatqan ál-aýqaty úshin, bizdiń ortaq úıimiz - Qa­zaqstan Respýblıkasy úshin daýys beremiz», - dep túıindegen bolatyn óz sózin Prezı­dent.

Al sáýirdiń 3-inen 4-ine aýǵan túni «Nur Otan» HDP-nyń Ortalyq apparatyndaǵy saılaýaldy shtabyna kelgen Memleket basshysy dál sol jerde óziniń myńdaǵan jaqtastarymen birge «Habar» telearnasynyń jańalyqtary arqyly QR Ortalyq saılaý komıssııasynyń saılaýǵa qatysýshylar belsendiligi týraly aldyn ala málimettermen, sondaı aq Exit-poll-dyń sońǵy málimetterimen tanysty. Saı­laý­shylardy ýchaske aldynan torýyldap, kimge daýys bergendigi týraly málimetterdi jınaıtyn, sóıtip, jedel aqparatty qam­tıtyn Exit-poll málimetteri bul joly da QR Prezıdenti N.Nazarbaevtyń aıqyn jeńiske jetkendigin kórsetken edi. Máselen, QR Áleýmettanýshylar men saıasattanýshylar qaýym­das­tyǵynyń júrgizgen saýalnamasynyń qorytyndysy boıynsha, 3 sáýir kúni ótken QR Prezıdentiniń kezekten tys saılaýynda Memleket basshysy Nursultan Nazarbaevqa saılaýshylardyń 94,82 paıyzy daýys­taryn bergen. Qalǵan kandıdattar boıyn­sha nátıjeler mynadaı bolǵan: Ǵanı Qasymovty saılaýshylardyń 2,17 pa­ıy­zy, Jambyl Ahmetbekovti 1,57 paıyzy, Mels Eleýsizovti 1,44 paıyzy jaqtaǵan.

Al «Demokratııa ınstıtýty» ǵylymı-zertteý qaýymdastyǵynyń saýalnamasy boıynsha respondentterdiń 95,1 paıyzy daýystaryn Memleket basshysy Nursultan Nazarbaevqa beripti. Sarapshylardyń boljaýynsha, mundaı saýalnama barysyn­daǵy qatelesý deńgeıi shashamen +-0,44 paıyzdy quraıtynyn da eske sala ketken jón.

Sonymen, aldyn ala málimetterdi óziniń saılaýaldy shtabynda, myńdaǵan jaq­tastarymen, óńirlerdegi shtab mú­shelerimen telekópir arqyly estip, tanys­qan Elbasy N.Nazarbaev ystyq yqylas pen zor qoshemetke ıe boldy. Telekópir arqyly baılanysqa shyqqan óńirlik shtab­tar Elbasy N.Nazarbaevty kezekti jeńi­simen quttyqtap jatty. Sosyn Prezıdent saılaýǵa óziniń kandıdatýrasyn usynǵan partııalyq áriptesterine, barlyq óńirdegi shtab múshelerine, «Qazaqstan - 2020» Jal­­pyulttyq demokratııalyq kúshter koa­lı­tsııa­syna, aımaqtardaǵy 29 myń senimdi óki­li men 80 myńnan astam erikti jaqtas­taryna, sondaı-aq saılaýǵa qatysyp daýys bergen barsha qazaqstandyqtarǵa alǵysyn aıtty. «Qadirli otandastar! Mine­keı, elimizdiń Táýelsizdik jyldaryndaǵy taǵy bir óte úlken tarıhı beles - Prezı­dent saılaýy óz máresine jetti. Ortalyq saılaý komıssııasynyń aldyn ala málimetteri boıynsha, qazaqstandyq­tar, bizdiń aza­mat­tarymyz meniń júrgizip otyrǵan saıa­satym­dy, ár kúni aptaǵa, ár aptasy jyl­ǵa balanatyn ótken 20 jyl boıy iste­gen sharala­rymyzdy maquldap, saılaýǵa qaty­sý arqyly bolashaqqa josparlaǵan bar­lyq baǵdarlamamyzǵa senim bildirip otyr. El basqaratyn adamǵa, memlekettiń Pre­zı­den­tine mundaı halyqtyń keń qol­daýy­nan, teńdessiz senimdilik bildirýinen artyq qandaı marapat kerek?! Sondyqtan da maǵan senimin artqan halqymnan aına­la­­ıyn!» - dedi úlken rızashylyqpen N.Na­zarbaev.

Sonymen qatar N.Nazarbaev aldyn ala málimetterge súıene otyryp, qa­zaq­stan­dyqtardyń basym bóligi kezekti ret reformany jaqtaǵanyn, qalyń kópshiliktiń qoǵamdy jańǵyrtý jolyn tańdaǵanyn, azamattarymyz ózderiniń ahýalyn odan saıyn jaqsartý baǵytyn qoldaǵanyn atap ótti. «Saılaýda dál saılaý kúni emes, odan buryn jasaǵan isteriń jeńiske jeteleıdi. Endeshe, bizdiń ótken 20 jylda júzege asyrǵan aýqymdy jumystarymyz beker bolmapty. Bul jolǵy saılaý ózimiz sol kezderi tańdaǵan baǵyttaǵy atqarylǵan isimizdiń berilgen baǵasy, synaǵy boldy», - degen Elbasy óziniń senimdi ókilderine, ásirese ózin jaqtaýda belsendilik tanytqan jastarǵa taǵy bir márte rızashylyǵyn bildirdi. Prezıdenttikke úmitker bolǵan basqa da kandıdattarǵa alǵysyn aıtyp, olardyń kótergen usynystaryna nazar aýdarý qajettigin eske saldy. «Bizdiń barlyq jetistikterimiz - birliktiń nátıjesi. Kópultty Qazaqstannyń tatýlyǵynyń jemisi. Bizdiń memlekettik saıasattyń eń basty baǵyty - qazaqstandyqtardyń turmysyn jaqsartý. Meniń Qazaqstan halqyna Jol­daýym men elimizdiń 2020 jylǵa de­ıin­gi strategııalyq damý josparynda kórsetilgen mindetter men soǵan baılanysty qa­byldanǵan baǵdarlamalardy júzege asy­rýǵa qarqynmen kirisýimiz kerek. Men sizderdi, qymbatty turǵylastarym, saıla­ýal­­dy naýqany kezinde qalaı tıimdi, saýatty ári bekem qımyldasańyzdar, osy jumysta da solaı áreket etýge shaqyra­myn», - dedi saılaýal­dy shtabynda óz jaqtastaryna arnap sóılegen sózin qorytyndylaǵan Elbasy N.Nazarbaev.

Saılaý - eldi biriktirdi, birtutastyqty tanytty

Exit-poll-dyń málimetteri men Ortalyq saılaý komıssııasynyń aldyn ala qorytyndylary jarııalanyp, jurt belsendiligi tanylǵannan-aq Elbasynyń jeńisi belgili bolǵan-dy. Sondyqtan bolar, saılaýdyń ertesinde Memle­ket basshysy Nursultan Na­zar­baevtyń qatysýymen Astanadaǵy "Qazaqstan" sport saraıynda «Elbasymen birge, alǵa!» atty jeńimpazdar forým uıymdastyryldy. Respýblıka óńirlerinen kelgen qoǵam, mádenıet qaırat­ker­leri, elimizdiń belgili tulǵalary, saıasatkerler, Prezıdenttiń senimdi ókilderi, sondaı-aq saılaýaldy shtabtarynyń músheleri men eriktileri jáne Elbasyn qol­daýshy jastar qatysqan dúbirli jıyndy da Prezıdent N. Nazarbaev sóz sóılep ashqan edi. «Qazaqstan halqy óziniń bolashaǵyna ne­giz­delgen el ishindegi birlikti saqtaıtynyn, órke­nıet­ti memleket ekenin dúnıejúzine taǵy da bir dá­lel­dep kórsetti. Táýelsizdigimizdiń 20 jyldy­ǵy qar­sa­ńynda úlken saılaý ótkizip, tórtkil dú­nıeniń naza­ryn Qazaqstanǵa aý­dardyq. Ashyq ári naǵyz ádil bolǵan saı­laýdyń nátı­jesinde, ja­ńa habarlaǵan máli­­met boıynsha, Qazaqstan saı­laýshy­larynyń 90 paıyzdan astamy meni qol­dap daýys berdi. Bul jeńis - barshamyzdyń je­ńi­simiz, bul jeńis - Qazaq­stan halqynyń jeńi­si», - dedi Elbasy forým bary­synda sóıle­gen sózinde.

Sonymen qatar Prezıdent N.Nazar­ba­ev ózine halyqtyń júktegen mandatyn alǵa me­jelengen elimizdiń ındýstrııa­lyq-ınno­vatsııa­lyq baǵdarlamasyn júzege asyrýǵa, qoǵamdy áleýmettik jańǵyrtýǵa, aýyl sharýashylyǵyn, bi­lim salasy men densaýlyq saqtaý salasyn kó­terýge jáne elimizdegi aza­mattarǵa kómek kórse­týge paıda­lanatynyn jetkizdi. Bıylǵy jyly aıqyn­dalǵan baǵdarlamaǵa toqtalǵan Elbasy jumyssyzdyqpen kúres másele­sine kóńil bólip, jańa ındýs­trııa­lyq kásiporyndardyń ju­mys isteýleri úshin jastardy oqytý máselelerine de mańyz beretinin jet­kizdi. Osy baǵdardy eńsergende azamattardy múldem basqa sapa, múldem basqa jumys kútetinin, endeshe, alda basqa ómir bolatynyn atap ótti. Mem­leket jastardyń eń úzdik bilim alýy úshin barlyq jaǵdaı­dy ja­sap jatqanyn, aldyńǵy tol­qynǵa ondaı bilim alý arman bolǵandyǵyn da atap kórsetti. «Shtabtardyń árbir aýylda, árbir aýdanda, árbir qalada ju­mys istegenin bilemin. Osy saılaý­da jeńiske jetýime kómek­tes­kenderdiń bar­lyǵyna úlken raqmetimdi aıtamyn. Bul meni kóp nársege mindetteıdi. Saılaýshylardyń 90 pa­ıyz­daıynyń saılaýǵa qatysýy jáne 90 pa­ıyzdan astamynyń meni qolda­ǵandary batys elderi úshin - sensatsııa. Ádette Prezıdent saı­laýy halyqty, el­di ártúrli partııalyq bloktarǵa bóletin bolsa, biz birige alatynymyzdy kórsettik. Álemniń ár túkpirinde qantógister, ulttar arasyndaǵy jan­jal­dar bolyp jatyr. Biz, Qazaq­stannyń barlyq ulttary men ulystary, barlyq dinderi birtutaspyz. Keıbir elderde jumys oryndary qys­qartylyp, zaýyttar toqtatylýda, al biz zaýyttar­dy turǵyzyp, ja­ńa ju­mys oryndaryn qurýdamyz. Keı­bir el­der­de zeınetaqylar qys­qartylyp jatsa, biz ony ul­ǵaı­týdamyz. Keıbir elderde aılyq jalaqy qys­qartylýda, biz ony ulǵaıtýdamyz. Bizdiń býynnyń peshe­ne­sine Qazaqstan elin órkenıetti mem­le­kettermen te­re­zesin teń etý mindeti júkteldi. Táýelsizdiktiń 20 jy­ly ishinde elimizdiń eko­nomıkasy túzelip, halyq­tyń ál-aýqatyn jaqsartý belesterin ótkerdik. Alaı­da alda talaı asýlar bar. Sondaı asýlardy ba­­ǵyn­dyrý jolynda tańdaýyn ja­saǵan barlyq Qa­zaq­stan hal­qy­na shynaıy rızashylyǵymdy bil­di­rip, bas ıip, alǵysymdy aıta­myn», - dedi Elbasy.

Prezıdenttik mandat memlekettiń aldyn­da turǵan mindetterin anyq­taý úshin beriledi - Elbasy

Al tústen keıin Prezıdent Nursultan Nazarbaev Qa­zaq­stan Respýblıkasy Prezıdentiniń kezekten tys saılaýynyń aıaqtalýyna baılanysty otandyq jáne sheteldik baspasóz quraldarynyń ókilderine ar­nap baspasóz máslıhatyn ótkizdi. Jıynda kirispe sóz sóılegen Prezıdent saılaýdyń ashyq, ádil, demokratııalyq talaptarǵa saı ótkenin, bular tý­raly sheteldik jáne ha­lyqaralyq uıymdardan kel­gen baıqaýshylar joǵary baǵa bergenin aıtty. Sonymen birge, Elbasy qazaqstandyq hám sheteldik BAQ ókilderine saılaý úderisine qy­zy­ǵý­shylyq tanytqandary úshin alǵysyn bildirip, jýrnalıster taarpynan qoıylǵan suraq­ta­rǵa jaýap berdi. Alǵashqy saýaldy qoıǵan ulybrıtanııalyq FBC telekompanııasynyń jýrnalısi Ekkard Seıgardyń aldaǵy bes jylda ustananyn baǵyty týraly suraǵyna Elbasy bylaı jaýap berdi: «Prezıdenttik mandat adamǵa memlekettiń aldyn­da turǵan mindetterin anyq­taý úshin beriledi. Elimizdiń damýyndaǵy eko­no­mıkalyq mindetterge kelsek, biz 2020 jylǵa deıin oryn­da­latyn ındýstrııalyq-ınnovatsııa­lyq baǵdarlamany iske asyrýdy qolǵa aldyq. Ózimniń jyl saı­ynǵy Joldaýymda men bıyl eldi áleýmettik jań­ǵyrtý máselesin alǵa qoıdym. Onda men azamat­ta­rymyzdy oqytyp, maman­dyq alý arqyly jumyspen qamtýdy, son­daı-aq turǵynúımen qamtamasyz etý prob­lemalaryn sheshý qajettigin Úkimetke tapsyr­dym. Bul baǵyttar halyq­tyń tolyq qol­daýyna ıe bol­dy».

Sonymen qatar Prezıdent N. Nazarbaev saıasat máselesine de oralyp, Qazaqstannyń aldaǵy ýa­qytta da ustanǵan baǵdary­nan aıny­maıtynyn aıtty. Máselen, Qazaqstan syrtqy saıasatta bolashaqta RF, QHR sııaq­ty eldermen tyǵyz yn­tymaq­tas­tyqty jalǵastyratyn bolady. Sol sekildi Eýroodaq pen AQSh Qazaqstannyń úlken áriptesteri bolyp qala beredi. Aımaqtaǵy basqa eldermen de yqpaldastyq úderister sheńberindegi yntymaqtastyq jal­­ǵasady. Sonan soń, Elbasy ishki saıasatqa da toqtady. «Eldi saıası jańalandyrý baǵytyn biz odan ári jalǵastyramyz. Zań­nyń ústemdigin sot júıesin táýel­sizdendire túsý arqyly nyǵaıtamyz. Bizdiń memleketimiz alyp terrıtorııaly, ýnı­tar­ly el bolsa da biz bılikti ortalyqsyzdandyrý baǵytyn odan ári júrgizý baǵytyndamyz. Sonymen qatar kelesi saılaýdan bastap bizdiń Parlamentimiz Konstıtýtsııanyń talabyna sáıkes kóppartııaly bolady. BAQ bostandyǵy men táýelsizdigine barlyq basqa da damyǵan elderdegi sııaqty eshqandaı shek qoı­yl­maıdy, bul iste biz ózimizdiń batystyq áriptesterimiz ben dostarymyzdyń usynystaryn únemi eskerip, olarmen keńesip otyratyn bolamyz. Saılaý úderisi kezinde qalyptasqan «Qazaqstan-2020» demokratııalyq koa­lıtsııasy» ala­ńynda biz op­pozıtsııalyq partııalar jáne qo­ǵamdyq qozǵalystarmen elimizdi ekonomıkalyq jáne saıası tur­ǵydan odan ári damytýdyń problemalaryn tal­qy­laý jónindegi dıalogtardy jal­ǵastyrýǵa daı­yn­byz», - dedi Elbasy.

Saılaý ótisimen, Ortalyq saılaý komıssııasynyń aldyn ala qorytyndylary jarııalana bastaǵan kezden-aq Prezıdent N. Nazarbaevty sheteldik áriptesteri quttyqtaı bastaǵan edi. Endi solardyń birazyna qulaq túrsek. Máselen, quttyqtaýshylardyń alǵashqylarynyń biri Reseı Prezıdenti Dmıtrıı Medvedev Qazaqstan Prezıdenti Nursultan Nazarbaevpen telefon arqyly sóılesip, eldegi kezekten tys saılaýdyń sátti ótkizilýimen jáne kelip túsip jatqan aqparatqa súıene otyryp, ondaǵy aıqyn jeńisimen N. Nazarbaevty quttyqtady. Al Qytaı Halyq Respýblıkasynyń Tóraǵasy Hý Tszıntao joldaǵan jedelhatynda: «Sizdiń Qazaqstan Respýblıkasynyń Prezıdenti qyzmetine qaıta saılanýyńyzǵa baılanysty Sizge ıgi tilegim men shyn júrekten quttyqtaýymdy joldaımyn. Siz Memleket basshysy bolǵan sátten bastap, Joǵary Mártebelim, elde qoǵamdyq turaqtylyq saqtalýda jáne ekonomıka joǵary qarqynmen ósti, halyqtyń ál-aýqaty úzdiksiz jaqsardy, Qazaqstannyń halyqaralyq jaǵdaıy edáýir nyǵaıa tústi. Sizdiń basshylyǵyńyzben Qazaqstan halqy jańa, memlekettiń damýy men kóterilýi isinde aıtarlyqtaı tabystarǵa jetetinine senemin» delingen. Budan bólek, Qytaı basshysy Qazaqstan men Qytaıdyń ózara qarym-qatynasyna toqtala kele, saıası salada ózara qurmet jáne joǵary deńgeıde ózara senim, al ekonomıkada ózara tıimdi ári birlesken damýdyń negizinde yntymaqtastyq ornyqqanyn aıtady. Ártúrli salalarda úzdiksiz tájirıbe almasýlar keńeıgenin, kópjaqty baılanystar aıasynda tyǵyz ózara is-qımyl men úılestirý qoldaý taýyp otyrǵanyn baıandaıdy. «Men Sizben birlese otyryp, Qytaı-Qazaqstan qarym-qatynastaryndaǵy strategııalyq seriktestikti bizdiń elderimiz ben halyqtarymyzdyń ıigiligi úshin taǵy da edáýir joǵary deńgeıge kóterýge sharshamastan kúsh-jigerimdi salýǵa daıynmyn», - delingen.

Al Frantsýz Respýblıkasynyń Prezıdenti Nıkolıa Sarkozıdyń Memleket basshysy N. Nazarbaevtyń atyna joldaǵan quttyqtaý jedelhatynda eń aldymen frantsýz basshysy referendým jobasyna qarsylyq bildirgen Konstıtýtsııalyq Keńestiń pikirin eskere otyryp, N. Nazarbaevtyń EQYU-nyń qundylyqtaryn ustanatynyn kórsetkenine rızashylyq bildiredi. «Men Sizdiń jańa qyzmette óz jumysyńyzdyń basym baǵytynyń biri saıası reformaǵa jańa qýatty serpilis berý bolyp tabylatynyn bilemin. Bizdiń mazasyz álemde reforma bizdiń halyqtarymyzdyń úmiti men kóńilin qanaǵattandyrý úshin qajet ekenin anyq túsinemiz. Óz tarapymnan, men Qazaqstannyń álemdik arenada ósip kele jatqan tanymaldyǵyn nazaryma ala otyryp, osy taqyrypqa jáne ózge de mańyzdy halyqaralyq taqyryptarǵa arnalǵan dıalogty jalǵastyrýǵa qýanyshty bolǵan bolar edim. Sondaı-aq Sizdiń elińiz bıylǵy jyly Islam Konferentsııasy Uıymynyń Mınıstrler Keńesine tóraǵalyq etetini sózime mysal bolsa kerek. Bıylǵy jyly Úlken Jıyrmalyqqa tóraǵalyq ete otyryp, óz basym biz talqylaýǵa tıisti mańyzdy máseleler boıynsha Qazaqstannyń únin estigim keledi. Atap aıtqanda, bul qarjylyq damý máselesi jáne halyqaralyq valıýta júıesi, sondaı-aq shıkizat naryǵy. Frantsııa sondaı-aq Qazaqstan men Eýropalyq Odaq arasyndaǵy seriktestikti kúsheıtý jónindegi jańa Kelisimniń qorytyndysyn qoldaýǵa daıyn», - deıdi quttyqtaýynda N. Sarkozı.

Sonymen qatar Nursultan Nazarbaevty QR Prezıdenti qyzmetine qaıta saılanýymen quttyqtaǵan AQSh Elshiligi Prezıdentpen jáne Qazaqstan halqymen odan ári keń aýqymdy strategııalyq áriptestikti jalǵastyrýǵa nıet bildiripti. «Biz Nursultan Nazarbaevty Qazaqstan Respýblıkasynyń Prezıdenti qyzmetine qaıta saılanýymen quttyqtaımyz. Ózimen jáne Qazaqstan halqymen bizdiń keń aýqymdy strategııalyq áriptestigimizdi júzege asyrý boıynsha jumysymyzdyń jalǵasýyn taǵatsyzdana kútýdemiz. Biz Eýropadaǵy qaýipsizdik jáne yntymaqtastyq uıymynyń (EQYU) aldyn ala nátıjelerin qoldaımyz jáne ol atap kórsetken jaqsarý úderisterin baǵalaımyz. Biz Qazaqstan Úkimetin EQYU-nyń esebinde aıtylǵan kemshilikterdi keshiktirmeı túzeýge shaqyramyz. Biz Qazaqstannyń saıası jaǵdaıdy odan ári yryqtandyrý boıynsha mindettemelerin qoldaımyz jáne saılaý úderisin úzdiksiz jetildirip otyrý onyń mańyzdy komponenti bolyp tabylatyndyǵyna senemiz», - delingen Qazaqstandaǵy AQSh Elshiliginiń habarlamasynda.

Al búgingi májilisinde QR Ortalyq saılaý komıssııasy Nursultan Nazarbaevty Qazaqstan Respýblıkasynyń Prezıdenti etip tirkeý týraly qaýly qabyldady. Qaýlyda sonymen qatar jańadan tirkelgen Prezıdentke tıisti kýálik pen omyraýǵa taǵatyn belgini tabys etý qajettigi de kórsetilgen. Sonymen qatar Qazaqstannyń jańa saılanǵan Prezıdenti Nursultan Nazarbaevty ulyqtaý rásimi 2011 jyldyń 8 sáýirine belgilendi.

Sóıtip, sáýirde elimiz ben eldigimiz úshin jasalǵan synnan Qazaqstan halqy súrinbeı ótken tárizdi. Saılaýshynyń 95,55 paıyzy N. Nazarbaevqa senim bildirip, bolashaǵynyń baıandylyǵyn Elbasy qolǵa alǵan baǵdarlamalarmen biriktirgisi keletinin tanytty. Prezıdenttikke kandıdat bolǵan tórteýdiń ishinen halyq tyńnan túren salýǵa tyrysqandardy emes, memleket basqarýdaǵy tájirıbesi mol, Táýelsizdiktiń tańy atysymen Qazaqstandy órkenıet kóshine bastap kele jatqan N. Nazarbaevty tańdady. Endeshe turmysymyz odan saıyn túzelip, saıasattaǵy alǵan baǵdarymyzdy baǵyndyrýǵa jazsyn!