Saılaý kúni shymkenttik avtobýstar jolaýshylardy tegin tasymaldaıdy

ShYMKENT. QazAqparat - 9 maýsym kúni ótetin kezekten tys prezıdent saılaýyna daıyndyq is-sharalary qyza tústi. Shymkentte osy kúni 260 saılaý ýchaskesi jumys isteıdi, dep habarlaıdy QazAqparat tilshisi.

Árbir azamat saılaýǵa qatysý arqyly eldiń qoǵamdyq-saıası ómirine mańyzdy úles qosady. Eldiń bolashaǵyn tańdaý - árbir azamattyń qolynda.

Eske salsaq, qala turǵyndary qaı saılaý ýchaskesinde daýys beretinin Shymkent qalasy ákimdiginiń resmı saıtynda, JSN nómirin jazý arqyly bile alady.

Aıta keterligi, 9 maýsym kúni Shymkentte qoǵamdyq kólikter qala turǵyndaryn tegin tasymaldamaq. Al saılaý ýchaskelerinde daýys berý saǵat 7:00-de bastalyp, 20:00-ge deıin jalǵasady.