Saılaý kúni 45 myńnan astam polıtseı qoǵamdyq tártipti qamtamasyz etedi

ASTANA. QazAqparat - 19 naýryzda Májilis jáne máslıhattar depýtattaryn saılaý kúni 45 myńnan astam tártip saqshysy qoǵam tynyshtyǵyn qadaǵalaıdy. Bul týraly QR Іshki ister mınıstrligi Ákimshilik polıtsııa komıtetiniń tóraǵasy Qaırat Sultanbaev málim etti, dep habarlaıdy QazAqparat tilshisi.

«Saılaý kúni qoǵamdyq tártipti qamtamasyz etý úshin el boıynsha 45 myńnan astam qyzmetker tartylyp jatyr. Onyń ishinde belgili bir bóligi tikeleı saılaý ýchaskelerinde jáne bir bóligi kóshede tártipti qadaǵalaıdy. Odan bólek, saılaý ýchaskelerine jaqyn aýmaqtarda kúzet bolady», - dedi Qaırat Sultanbaev Ortalyq saılaý komıssııasy otyrysynda.

Sondaı-aq Ákimshilik polıtsııa komıtetiniń basshysy qoǵamdyq tártiptiń tıisti deńgeıde qamtamasyz etiletinin aıtyp sendirdi.

Aıta ketsek, OSK otyrysynda belgili bolǵandaı, Májilis pen máslıhattar depýtattyǵyna kandıdattar sotqa 166 aryz túsirgen.

Óz kezeginde Bas prokýratýra erteńgi tynyshtyq kúnine qatysty málimdeme jasaǵan bolatyn.

Odan bólek, saılaýaldy naýqan kezinde qandaı zań buzýshylyqtar jıi tirkelgeni baıandaldy.