Saılaý qorytyndysy týraly aıtý áli erte – ShYU ókili

ASTANA. QazAqparat – Shanhaı yntymaqtastyq uıymy Bas hatshysynyń orynbasary, mıssııa basshysy Grıgorıı Logvınov ótip jatqan saılaýǵa qatysty halyqaralyq baıqaýshy retinde óz oıyn bildirdi, dep habarlaıdy QazAqparat tilshisi.

«Saılaý qorytyndysy týraly aıtý áli erte. Protsess ótip jatyr. Baıqaýshylar mıssııasy óz jumysyn bastady. Astanada besinshi kún júrmiz. Osy ýaqyt ishinde Ortalyq saılaý komıssııasy basshylyǵymen kezdesý ótkizdik. Biz birneshe saılaý ýchaskesinde boldyq, jaqsy áserdemiz. Saılaýǵa daıyndyqtyń jan-jaqty, ári kásibı deńgeıde ekenin atap ótkim keledi. Ásirese tehnıkalyq sátterge erekshe mán berilgen», - dedi Grıgorıı Logvınov elordadaǵy №111 saılaý ýchaskesinde BAQ ókilderine suhbat bere turyp.

Sondaı-aq ShYU Bas hatshysynyń orynbasary elimizdiń depýtattyq korpýsyna qatysty pikir bildirdi.

«Bizde óte optımıstik jáne oń kózqaras qalyptasty. Qazaqstan ShYU-nyń eń jaýapty músheleriniń biri. Biz beıtarap pozıtıvti kózqarasty basshylyqqa alamyz. Sonymen qatar, memlekettik ishki isine aralaspaımyz jáne saılaý zańnamasyna baǵa bermeımiz. Bul ShYU-nyń negizgi qaǵıdattaryna úzildi-kesildi qaıshy», - dep tolyqtyrdy sheteldik meıman.

Aıta ketsek, Shanhaı yntymaqtastyǵy uıymy atynan búgingi saılaý barysyn 18 baıqaýshy qadaǵalap jatyr. Olar baıqaýshy mindetterin elorda jáne Aqmola oblysynda júrgizýde.