Saılaý komıssııalarynyń múshelerin daıyndaýǵa ákimdikter qatyspaq

NUR-SULTAN. QazAqparat - Alǵash ret kezekten tys prezıdenttik saılaýǵa saılaý komıssııalarynyń múshelerin daıyndaýǵa ákimdikter de atsalysatyn bolady. Bul týraly búgin QR Ortalyq saılaý komıssııasynyń hatshysy Sábıla Mustafına aıtty, dep habarlaıdy QazAqparat tilshisi.

«Saılaý komıssııalarynyń múshelerin daıyndaý isine alǵash ret ákimdikter de jergilikti bıýdjet qarajaty esebinen qatysatyn bolady. Ol úshin Bıýdjet kodeksine, «Memlekettik basqarý jáne ózin ózi basqarý týraly» Zańǵa túzetýler engizilgen edi. Bul osy jolǵy saılaý naýqanynyń jańalyǵy», - dedi ol BAQ ókilderine bergen suhbatynda.

Onyń aıtýynsha, Ortalyq saılaý komıssııasy oblystyq, Nur-Sultan, Almaty, Shymkent qalalary saılaý komıssııalarynyń múshelerin beınekonferentsbaılanys rejıminde turaqty negizde ótkiziletin onlaın-keńester aıasynda saılaý naýqanynyń naqty kezeńderi boıynsha oqytý tájirıbesin jalǵastyratynyn aıtty.

«Sáýir aıynyń sońyna deıin barlyq aýmaqtyq saılaý komıssııalarynyń múshelerin, al mamyrdyń sońyna deıin saılaý komıssııasy ýchaskeleriniń barlyq múshelerin oqytýdy aıaqtaýdy maqsat etip otyrmyz. Qarjy mınıstrligi 2019 jyly OSK deńgeıinde elektoraldy oqytýǵa 10 mln teńgeni qoldady», - dedi S.Mustafına.