Saılaý komıssııalary daýystardy sanaýǵa kiristi - QR OSK

ASTANA. QazAqparat - Elimizdiń ýchaskelik saılaý komıssııalarynyń músheleri saılaýshylardyń daýystaryn sanaýǵa kiristi. Bul týraly búgin QR Ortalyq saılaý komıssııasynyń hatshysy Baqyt Meldeshov málim etti.

«Elimizdiń óńirlerinde QR Parlamenti Májilisi men máslıhattary depýtattaryna daýys berý aıaqtaldy. Qazirgi ýaqytta ýchaskelik saılaý komıssııalarynyń músheleri saılaýshylardyń daýystaryn sanaýǵa kiristi», - dedi QR OSK hatshysy.

B.Meldeshovtiń atap ótýinshe, Qazaqstannyń saılaý zańnamasyna sáıkes árbir saıası partııa men árbir kandıdat úshin daýystar jeke-jeke sanalatyn bolady.

«Ýchaskedegi daýystardy sanaý ýaqyty sanaý bastalǵan sátten 12 saǵattan aspaýy tıis. Batys óńirlerde, atap aıtqanda, Mańǵystaý, Atyraý, Aqtóbe, Batys Qazaqstan oblystarynda ýaqyt aıyrmashylyǵyna baılanysty daýys berý endi ǵana aıaqtaldy. Buǵan qosa, sheteldegi 65 ýchaskeniń 47-sinde daýys berý jalǵasýda», - dedi B.Meldeshov.

Aıta keterligi, saılaýshylardyń daýys berýge kelýi jaıyndaǵy aldyn ala málimetter Astana ýaqyty boıynsha saǵat 22-30-da jarııa etiledi.