Saılaý komıssııalary ákimdikten táýelsiz bolýy kerek – Nurlan Ábdirov

ATYRAÝ. QazAqparat – Saılaý komıssııalary ákimdikterden táýelsiz bolýy kerek. Daýys berý kezinde túrli burmalaýshylyqqa jol berilmeýi tıis. Atyraý oblysynyń jurtshylyǵymen kezdesken Ortalyq saılaý komıssııasynyń tóraǵasy Nurlan Ábdirov osyndaı pikir bildirdi, dep habarlaıdy QazAqparat.

Ortalyq saılaý komıssııasynyń tóraǵasy Nurlan Ábdirovtiń aıtýynsha, buryn jurtshylyqpen mundaı kezdesý uıymdastyrylmaǵan.

Sol sebepten, keshe komıssııa tóraǵasy Mahambet aýdanyndaǵy Saraıshyq aýyldyq okrýginiń turǵyndarymen júzdesti.

Bul aýylda byltyrǵy tamyzda okrýg ákiminiń saılaýy ótip, jańa ákim saılanǵan.

Búgin óńir jurtshylyǵymen kezdesýde aýyl ákimderiniń saılaýy, ýchaskelik saılaý komıssııalary jumysynyń ashyqtyǵyn qamtamasyz etý, baıqaýshylardyń saılaý ýchaskelerine kirýine kedergi keltirmeýge baılanysty máseleler qozǵaldy.

«Ortalyq saılaý komıssııasynyń ustanatyn maqsaty – saılaýdyń ashyqtyǵyn qamtamasyz etý. Óńirlerdegi saılaý komıssııalaryna osyndaı talap qoıylyp otyr. Saılaý protsesiniń ashyqtyǵyn qamtamasyz etý úshin saılaý komıssııalary ákimdikterden táýelsiz bolýy kerek. Daýys berý kezinde túrli burmalaýshylyqqa jol berilmeýi tıis. Sol sebepten, oblystarǵa saparymyzdyń maqsaty – alys aýyldaǵy turǵyndardyń pikirin bilý», -dedi óńir jurtshylyǵymen kezdesýde Nurlan Ábdirov.

Saılaý protsesine baıqaýshy retinde qatysyp júrgen qoǵam belsendileriniń aıtýynsha, birqatar problema bar.

Bul – partııa ókilderiniń saılaý ýchaskelerine baıqaýshy retinde kirýine jasalatyn kedergi.

«Eger baıqaýshynyń qujattary zań talaptaryna sáıkes rásimdelgen bolsa, ol saılaý ýchaskelerine kedergisiz kirýi qajet. Bıýlleten sanaý syndy mańyzdy protsester kezinde baıqaýshy barlyq úrdisti tolyq kóre alatyndaı qashyqtyqta otyrýy kerek», -dedi osyǵan oraı Ortalyq saılaý komıssııasynyń tóraǵasy Nurlan Ábdirov.

Kezdesýde qoǵam belsendileri saılaý kezinde elektrondy daýys berý múmkindigi týraly máseleni kóterdi.

«Shyny kerek, saılaýshylardyń elektrondy túrde daýys berýin uıymdastyrý óte kóp qarjyny qajet etedi. Buǵan deıingi tájirıbe elektrondy daýys berý múmkindigin saılaýshylardyń az bóligi qoldanǵanyn kórsetti. Degenmen, bul másele áli de zertteledi. Elimizde múmkindigi shekteýli jandar bar. Jastar smartfondy kúndelikti qoldanady. Osyndaı sebepter eskerilip, elektrondy daýys berý múmkindigin qaldyrý, ne qaldyrmaý máselesi jan-jaqty zerttelgen soń sheshiledi», -dedi Nurlan Ábdirov.