Saılaý qoǵamnyń saıası ómirge qatysy bar ekenin sezindiredi - Túrkimenstan baıqaýshysy

ASTANA. QazAqparat - Saılaý qoǵamnyń saıası ómirge qatysy bar ekenin sezindiredi. Búgin QR Ortalyq saılaý komıssııasynyń tóraǵasy Qýandyq Turǵanqulovpen kezdesken Túrkimenstan Saılaý jáne referendýmdar ótkizý jónindegi ortalyq komıssııasynyń tóraǵasy Gýlmýrad Mýradov osylaı dedi.

«Bizder ýaqyt synynan ótken qońsylas kórshi, tatý-tátti dos eldermiz. Biz Qazaqstannyń qol jetkizgen jetistikterin, alǵa basqan senimdi qadamyn maqtan tutamyz», - dedi G.Mýradov.

Sonymen qatar ol Qazaqstan tarabyna kezekten tys prezıdenttik saılaýǵa halyqaralyq baıqaýshy retinde qatysýǵa shaqyrtý jibergeni úshin rızashylyǵyn bildirdi.

«Saılaý qoǵamnyń saıası ómirge qatysy bar ekendigin jete sezindiredi. Kez kelgen memlekette saılaý ótkizý eldiń damýy úshin, zamanaýı demokratııalyq memlekettiń negizin qalaý úshin zor mánge ıe», - dedi ol.

Óz kezeginde Q.Turǵanqulov Ortalyq saılaý komıssııasynyń prezıdenttik saılaýdy ázirleý men ótkizý jónindegi qyzmetimen tanystyrdy. Túrkimenstan tarabynyń saılaýǵa qatysty saýaldaryna egjeı-tegjeıli jaýap berdi.