Saılaý kezinde tótenshe jaǵdaı qyzmeti qalaı jumys isteıdi
Komıtet tóraǵasy Vladımır Bekkerdiń sózine súıensek, zań boıynsha tótenshe jaǵdaı qyzmetiniń ókilderi saılaý ýchaskelerinde kezekshilik ete almaıdy. Sol úshin olar saılaý ýchaskesi ornalasqan ǵımarattardyń mańaıynda baqylaý júrgizetin bolady. Іshtegi jaǵdaıdy ara-tura kirip baqylamaq.
«7 maýsymnan bastap Іshki ister mınıstrliginiń jeke quramy túgeldeı kúsheıtilgen rejimge kóshiriledi. Al tótenshe jaǵdaı komıtetiniń baqylaýyna 9900-den astam daýys berý ýchaskesi berilgen. Onyń 458-i - jabyq tıptegi nysandar. Ár ýchaskege bir qyzmetker bekitilgen. Saılaý kúni daýys berýshiler kelgenshe ár qyzmetker ózi jaýapty ýchaskeni sońǵy ret tekserip, qaýipsizdik erejeleri saqtalǵanyna kóz jetkizetin bolady», - deıdi komıtet basshysy.
Ol sondaı-aq, saılaýdyń jazda ótýi tótenshe jaǵdaı ókilderiniń jumysyn birshama jeńildetkenin aıtady.
«Bizge qys kezinde saılaýdy qadaǵalaý qıynyraq soǵatyn. Óıtkeni jylytý nysandary múltiksiz jumys isteýi kerek. Keıbir ýchaskelerde qosymsha jylytý qondyrǵylary qoıylady. Onyń bári qosymsha táýekel bolatyn biz úshin. Al jazda bul jaǵynan áldeqaıda jeńil», - deıdi komıtet tóraǵasy.