Saılaý kezinde qoǵamdyq qaýipsizdikti saqtaýǵa 10 myń polıtseı jumyldyrylady

NUR-SULTAN. QazAqparat - Saılaý ýaqytynda qoǵamdyq qaýipsizdikti saqtaýǵa búkil Qazaqstanda 10 myń polıtseı jumyldyrylady. Bul týraly Іshki ister mınıstrliginde ótken baspasóz máslıhatynda QR ІІM Ákimshilik polıtsııa komıtetiniń tóraǵasy Maqsat Baıbolov málim etti, dep habarlaıdy QazAqparat tilshisi.

«Ózderińiz biletindeı, 7-12 maýsym aralyǵy - kezekten tys saılaý ýaqytynda biz kúsheıtilgen qyzmet túrine aýysamyz. Saılaý aldyndaǵy kezeńde «Saılaý týraly» konstıtýtsııalyq zańnamaǵa sáıkes, barlyq aımaqtarda quqyqtyq tártip pen qoǵamdyq qaýipsizdik qamtamasyz etiletin bolady. Jalpy, ІІM el aýmaǵynda qoǵamdyq qaýipsizdiktiń turaqty bolýy úshin barlyq sharalardy qabyldap jatyr», - dedi Maqsat Baıbolov.

Komıtet tóraǵasynyń aıtýyna qaraǵanda, iri qalalarǵa, máselen Nur-Sultanǵa basqa aımaqtardan polıtsııa qyzmetkerlerin tartý josparlanyp otyrǵan joq.

«Nur-Sultandaǵy qoǵamdyq qaýipsizdikti saqtaý úshin barynsha kóp qyzmetker jumyldyrylatyny anyq. Al saılaý ýchaskelerine (barlyq óńir boıynsha) 19 myńǵa tarta qyzmetker jumyldyrylady. Sebebi, zańǵa sáıkes, bıýlletenderdi qorǵaý - polıtsııa qyzmetkerleriniń mindeti. Al jalpy, el boıynsha qoǵamdyq qaýipsizdik sharalaryna 10 myń polıtsııa qyzmetkeri tartylady», - dedi Maqsat Baıbolov.

Aıta ketsek, buǵan deıin 9 maýsym kúni ótetin prezıdent saılaýynda tótenshe jaǵdaı qyzmeti de kúsheıtilgen rejimde jumys isteıtini habarlanǵan bolatyn.