Saılaý qarsańyndaǵy kúnde jáne saılaý kúninde kez kelgen úgitke tyıym salynady - QR OSK

ASTANA. QazAqparat - Saılaý qarsańyndaǵy kúnde jáne saılaý kúninde kez kelgen úgitke tyıym salynady. Bul týraly búgin QR Ortalyq saılaý komıssııasynda ótken brıfıngte komıssııa hatshysy Baqyt Meldeshev málim etti.

«Ortalyq saılaý komıssııasynyń qaýlysymen belgilengen Prezıdent saılaýyn ázirleý men ótkizý jónindegi negizgi is-sharalardyń kúntizbelik josparyna saı saılaý aldy úgit júrgizýge 30 kún bekitilgen. Ol 26 naýryzdan bastalyp, 24 sáýir kúni saǵat 00.00-de aıaqtalady. Saılaý qarsańyndaǵy kúnde jáne saılaý kúninde kez kelgen úgitke tyıym salynady», - dedi ol.

Sonymen qatar OSK hatshysy azamattardyń sanaly túrde erik bildirýine yqpal etetin saılaý aldy úgit júrgizýdiń jalpy sharttarymen, erejelerimen tanystyrdy.

«Saılaý zańnamasynyń eń mańyzdy talaby - saılaý protsessine qatysýshylar úshin teń quqyqtar men jaǵdaılardy qamtamasyz etý. Saılaý týraly konstıtýtsııalyq zańda saılaý aldyndaǵy úgit 4 baptan turady, 5 taraý arnalǵan. Zańnamalyq turǵydan alǵanda, saılaý aldyndaǵy úgit - saılaýshylardyń belgili bir kandıdatty, saıası partııany jaqtap nemese qarsy daýys berýge qatysýǵa túrtki bolý maqsatyndaǵy qyzmet», - dedi B.Meldeshev.

Onyń atap ótýinshe, úgit qyzmetinde sýbektilerdiń quqyqtyq jaǵdaıy ártúli. Osylaısha, saılaý aldyndaǵy úgit belsendi, saılaý quqyna ıe saılaýshylarǵa, qoǵamdyq birlestikterge, qarjylandyrýdy qajet etpeıtin úgit protsessine qatysýshylarǵa úlken múmkindik beredi.