Saılaý: Qaraqat Ábdendi qoldaý shtaby ashyldy
«QR Prezıdenttigine kandıdat Qaraqat Ábdendi qoldaý jónindegi shtab jumysyn bastady. Aldymen uıymdastyrý komıtetiniń otyrysyn ótkizip, naqty tapsyrmalar berildi. Elimizdiń 20 óńirinde bizdiń shtab jumysqa daıyn. Úgit-nasıhat materıaldaryn ázirleý, basqa da tıisti daıyndyq jumystary júrgizildi. Astana qalasyndaǵy ortalyq shtabta 10-ǵa jýyq adam jumys isteıdi», - dedi shtab basshysynyń orynbasary Berik Tórebekov.
Onyń aıtýynsha, úgit-nasıhat jumysy elimizdiń barlyq óńirinde onlaın jáne oflaın formatta ótedi.
«Sondaı-aq kandıdatty qoldaýǵa arnalǵan resmı saıt iske qosyldy. Odan bólek, áleýmettik jelilerde akkaýnttar ashyldy. Ol jerde shtabtyń is-sharalary, saılaýshylarmen kezdesýler jáne úgit-nasıhat materıaldary ornalastyrylady», - deıdi ol.
Eske salsaq, 7 qazanda «Kásibı áleýmettik jumyskerler ulttyq alıansy» respýblıkalyq qoǵamdyq birlestigi kezekten tys prezıdent saılaýyna Qaraqat Ábdenniń kandıdatýrasyn usynǵan bolatyn.
19 qazan kúni QR Ortalyq saılaý komıssııasy prezıdent saılaýyna Qaraqat Ábdendi kandıdat retinde resmı tirkedi.