Saılaý halyqtyń birligin arttyrady - Janseıit Túımebaev

NUR-SULTAN. QazAqparat - Qazaqstanda ótetin kezekten tys Prezıdent saılaýy - ýaqyt pen sońǵy saıası ózgerister talaby. Bul pikirdi Qazaqstan halqy Assambleıasy Tóraǵasynyń orynbasary Janseıit Túımebaev bildirdi, dep habarlaıdy QazAqparat tilshisi.

«Kezekten tys Prezıdent saılaýy - elimizdegi eń mańyzdy saıası oqıǵa. Saılaý - ýaqyt pen sońǵy saıası ózgeristerden keıingi logıkanyń talaby. Bıylǵy naýryz aıynda joǵarǵy bılik negizgi zańnyń talaptaryna sáıkes aýystyryldy. Ásirese, onyń turaqtylyq pen boljamdy jaǵdaıda beıbit ahýalda ótkeni mańyzdy», - dedi Janseıit Túımebaev QHA-nyń «Jańǵyrý joly» jastar qozǵalysy uıymdastyrǵan «PRodvıgaı sebıa» trenınginde.

Ol táýelsiz Qazaqstan tarıhynda bıliktiń alǵash ret aýysqanyn atap ótti.

«Saıası tranzıt jaǵdaıynda etnosaralyq jáne dinaralyq qarym-qatynastar máselesin teris aǵymdar óz maqsattaryna jıi qoldanady. Qazaqstanda ondaı oqıǵalar bolyp jatqan joq - eldegi etnosaralyq jaǵdaı turaqty jáne jaǵymdy bolyp qala beredi», - dedi ol.

Sonymen birge, Janseıit Túımebaev Prezıdent saılaýy qoǵamdyq kelisim men jalpyulttyq birlikti nyǵaıtatynyn jetkizdi.

«Saılaý el aldynda turǵan mindetterdi tabysty atqarý úshin halyqtyń birigýine serpin beredi», - dedi J. Túımebaev.