Saılaý elimizdi baıandy bolashaq jolyna biriktiredi

NUR-SULTAN. QazAqparat - Prezıdent saılaýy Táýelsiz Qazaqstannyń saıası ómirinde erekshe oqıǵa bolyp, teńdessiz nátıjesimen tarıhta qalýy kerek. Óıtkeni, saılaýdan bastalǵan usynys-pikirler keıinnen jańadan saılanǵan Prezıdenttiń tuǵyrnamalyq josparyna aınalyp, túrli salalarda reforma retinde zańnamalyq bekip, keleshekte naqty is júzine asyrylatynyna halyqtyń senimi mol.

Álbette, reformalar Qazaqstanda shırek ǵasyrdan beri úzdiksiz júrgizilip kele jatyr. Degenmen, jahandyq syn-qaterler jáne álemde turaqsyzdyq oryn alǵan kúrdeli kezeńde Elbasynyń kóregendikpen, danalyqpen bılik tizginin demokratııalyq jol arqyly halyqtyń quzyryna, kópshiliktiń tańdaýyna usynýy, shyn máninde, tarıhı sheshim boldy. Qazirgi barsha qazaqstandyqtardyń murat-múddesi obektıvti túrde sol tańdaýdy júzege asyryp, ózindik tańdaý jasaý.

Bul jerdegi basshylyqqa alatyn eń ózekti másele - qoǵam ómirindegi sabaqtastyqty saqtap, buǵan deıingi el ekonomıkasynyń damý úrdisin, áleýmettik birlik pen turaqtylyqty, jasampazdyqty odan ári jalǵastyrý reformasy. Bastaǵan Bul Qazaqstannyń damýyn jańa sapaǵa jeteleıtini de anyq.

Kezekten tys prezıdenttik saılaý ótkizý týraly bastama kóterilip, keıinnen Qazaqstandaǵy qoǵamdyq uıymdar, birlestikter, saıası partııalar men jekelegen saıasatkerler, sondaı-aq sheteldik sarapshylar tarapynan qyzý qoldaý jasalǵan saılaýdy merziminen buryn ótkizýdiń qajettigi eń aldymen álemdik ekonomıkalyq daǵdaryspen, kúrdeli halyqaralyq jaǵdaımen baılanysty.

Elbasy aıtqandaı, qaıta qaharyna mingen álemdik daǵdarys jaǵdaıynda birlik bizge burynǵysynan beter qundy. Memlekettiń tynyshtyǵy men eldiń birligin saqtap damytý, el Prezıdenti bastap, eli qostaǵan kezde ǵana baıandy bolmaq. Jaýapkershilik búkil halyqqa da júkteledi. Osyny umytpaıyq. Aldaǵy bıik belester men asqar asýlar úshin biz barlyq kedergilerdi baǵyndyryp, alǵa basýǵa tıispiz. Saılaý elimizdi uly isterge uıystyryp, baıandy bolashaq jolynda biriktire túserine senemin. Qazaqstandyqtardy el tarıhyndaǵy taǵy bir taǵdyrly oqıǵaǵa jaýapkershilikpen qarap, belsene qatysýǵa shaqyramyn.

Atalmysh protsess ómirdiń sapaly satysyna kóterilýdiń, alda saılanatyn prezıdenttiń aldynda turǵan orasan zor jumystyń alǵysharty men negizi bolýy tıis.

Bul saılaý qazaqstandyqtardyń memlekettik tutastyq, eldik qýat, jasampazdyq áleýetin áshkereleıtin jáne eldigimizdi baıandaıtyn bolady.

Fahrıddın QARATAEV,

QR Parlament Májilisi depýtaty.