Saılaý: EQYU baıqaýshylar mıssııasy Qazaqstandaǵy jumysyn aıaqtaýda
Qazaqstan Syrtqy ister mınıstriniń orynbasary Roman Vasılenko saılaýdy baıqaý jónindegi EQYU Demokratııalyq ınstıtýttar jáne adam quqyqtary jónindegi bıýrosy mıssııasynyń basshysy Oýen Merfımen qorytyndy kezdesý ótkizdi.
Taraptar Qazaqstandaǵy mıssııanyń jumysyn qorytyndylap, EQYU mıssııasy 20 naýryzda jarııalaǵan parlamenttik saılaýdy baıqaý boıynsha Aldyn ala nátıjeler men tujyrymdar týraly málimdemesiniń keıbir tarmaqtaryn talqylady.
Mınıstrdiń orynbasary baıqaýshylarǵa atqarylǵan jumystary úshin alǵysyn bildirip: «Qazaqstan EQYU-nyń elimizdiń demokratııalyq damýy salasyndaǵy halyqaralyq qoldaýyn baǵalaıdy», - dep atap ótti.
O. Merfı atalǵan saılaý «ózin-ózi usynǵan kandıdattarǵa saılaýǵa qatysýǵa múmkindik berip, saıası ómirge básekelestik elementterin ákelgenin jáne saılaýshylardyń tańdaý jasaý múmkindigin ulǵaıtqanyn» atap ótti. Sondaı-aq ol memlekettik organdardyń, saıası partııalar men azamattyq qoǵam ókilderiniń mıssııaǵa qatysty kásibıligi men jedeldigin joǵary baǵalaı otyryp, kórsetilgen qolǵabys úshin Qazaqstan tarapyna alǵysyn bildirdi.
EQYU parlamenttik saılaýdy baıqaý jónindegi saılaý úderisin odan ári jetildirý boıynsha usynystary bar qorytyndy esebiniń daıyndalýy áńgimeniń jeke taqyryby boldy. R. Vasılenko DIAQB esebin jasaý kezinde obektıvti tásildiń mańyzdylyǵyn taǵy da atap ótti.
EQYU ókilderi tıisti usynystar qorytyndy esepte birneshe aıdan keıin usynylatynyn jetkizdi jáne bul usynystar QR saılaý júıesin halyqaralyq standarttarǵa, ozyq sheteldik tájirıbelerge jáne 1990 jyly EQYU Kopengagen qujatynda belgilengen mindettemelerge sáıkes odan ári jańǵyrtý úshin paıdalanylatynyna úmit bildirdi. Baıandama jarııalaǵannan keıin Bıýro qujatty QR Ortalyq saılaý komıssııasy men basqa da múddeli memlekettik organdarymen egjeı-tegjeıli talqylaý úshin Qazaqstanǵa saraptama tobyn jiberýge múddeli.
Kezdesýdiń sońynda taraptar Qazaqstan men EQYU-nyń saılaýdy ótkizý salasyndaǵy syndarly jáne jemisti yntymaqtastyǵyn odan ári damytýǵa qatysty pikir almasty.