Saılaý: Daýys berý sheteldegi 44 ýchaskede ǵana jalǵasýda

ASTANA. QazAqparat – Májilis pen máslıhattar depýtattarynyń qorytyndy statıstıkasy erteń usynylady. Bul týraly Ortalyq saılaý komıssııasy tóraǵasynyń orynbasary Konstantın Petrov aıtty, dep habarlaıdy QazAqparat tilshisi.

«Eldegi barlyq ýchaskede daýys berý aıaqtaldy. Daýys berý tek elden tys jerlerde, 44 ýchaskede jalǵasady. Daýys berý protsesin kandıdattardyń senimdi adamdary, saıası partııalardyń, qoǵamdyq uıymdardyń jáne buqaralyq aqparat quraldarynyń ókilderi baıqaýdy júzege asyrdy. Qorytyndy statıstıka erteń usynylady», - dedi Konstantın Petrov Májilis pen máslıhattar depýtattaryn saılaýdyń aldyn ala qorytyndysyn jarııalaýǵa arnalǵan brıfıngte.

Onyń atap ótýinshe, astana ýaqytymen saǵat 22-00-degi jaǵdaı boıynsha tizimge engizilgen 12 mln 35 578 azamattyń 6 mln 521 860-y bıýlleten aldy. Bul daýys berý tizimine engizilgen saılaýshylardyń 54,19 paıyzyn quraıdy.