Saılaý barysyn qadaǵalaıtyn 20 myń baqylaýshy arnaıy kýrstan ótip jatyr

ASTANA. QazAqparat - Saılaý kúni daýys berý protsesiniń adal ári ashyq ótýin Halyqtyq koalıtsııanyń 20 myń baıqaýshysy qadaǵalaıdy. Olar Saıası menedjment akademııasy ázirlegen arnaıy kýrstan ótip jatyr, dep habarlaıdy QazAqparat.

20 qarashada Halyqtyq koalıtsııanyń baıqaýshylary zańǵa sáıkes, barlyq saılaý protsesiniń adal ári ashyq ótýin qadaǵalaıdy. Saıası menedjment akademııasynyń mamandary baıqaýshylardyń quqyqtary men mindetteri egjeı-tegjeıli sıpattalǵan ádistemelik qural ázirledi.

Baıqaýshy Nursulý Namazbaeva oqytý protsesi ınteraktıvti formatta ótip jatqanyn atap ótti.

«Trenerlerdiń daıyndyq deńgeıi óte joǵary. Daıyndyǵymyzǵa kóp kóńil bólinip jatqany seziledi. Saılaýdyń ashyqtyǵyn qamtamasyz etýdiń Halyqtyq koalıtsııa úshin mańyzy zor. Oqytý protsesi tájirıbege baǵdarlanǵany qýantady. Sabaq barysynda naqty jaǵdaılardy taldaımyz», – dedi ol.

Aıta ketý kerek, bıyl 3 qarashadan bastap trenerler barlyq oblys pen aýdanǵa baryp, Halyqtyq koalıtsııanyń baıqaýshylaryn saılaý kúngi jumysqa daıyndaý, oqytý protsesine kiristi. Elimizdiń 20 óńirinde 15 myńnan astam baıqaýshy oqytyldy. 18 qarashaǵa deıin 20 myń baıqaýshyny oqytý josparlanyp otyr.

Daýys berý kúni Halyqtyq koalıtsııanyń baıqaýshylary elimizdiń barlyq saılaý ýchaskesinde jumys isteıdi.