Saılaý ashyq, ádildik qaǵıdatyna sáıkes ótti - Redjep Sheker

ASTANA. QazAqparat – Túrki memleketteri Parlamenttik Assambleıasy (TúrkPA) baıqaýshylar mıssııasynyń jetekshisi Redjep Sheker Qazaqstanda depýtattardy saılaý protsesine qatysty pikir bildirdi, dep habarlaıdy QazAqparat tilshisi.

«QR Ortalyq saılaý komıssııasy tóraǵasymen, senatorlarmen, sondaı-aq QR Syrtqy ister mınıstriniń orynbasarymen kezdestik. TúrkPA baıqaýshylary saılaý protsesi týraly barlyq aqparatty aldy. Mıssııa músheleri saılaýǵa qatysqan saıası partııalardyń ókilderimen de kezdesip, olardyń baǵdarlamasymen tanysty. Biz saılaý ýchaskeleri ashylǵan sátten bastap daýystardy sanaýǵa deıingi barlyq kezeńderine qatystyq. Sonymen qatar jergilikti baıqaýshylarmen pikir almastyq», - dedi R. Sheker elordadaǵy Halyqaralyq baıqaýshylarǵa qolǵabys kórsetý ortalyǵynda ótken brıfıngide.

Onyń aıtýynsha, daýys berý barysy erejege saı ótip, saılaý protsesi kezinde qajet resýrstar qamtamasyz etildi.

«Bizdiń mıssııa saılaý protsesine daıyndyq deńgeıin, sondaı-aq saılaýǵa qatysty joǵary baǵa berip otyr. Sondaı-aq mıssııa osy saılaýdy uıymdastyrý boıynsha atqarylǵan jumystardy oń baǵalady. Sondyqtan TúrkPA baıqaýshylar mıssııasy bul saılaý ashyq, ádildik qaǵıdatyna sáıkes ótti dep sanaıdy», - dedi Redjep Sheker.