Saılaý arqyly bılikke laıyqty tulǵalar kelý úshin BAQ halyq tańdaýyna erekshe áser ete alady - M. Bashımov

ASTANA. QazAqparat - Saılaý arqyly bılikke laıyqty tulǵalar keltirý úshin BAQ halyq tańdaýyna erekshe áser ete alady. «Chelovek ı zakon» gazetiniń bas redaktory, zań ǵylymdarynyń doktory Marat Bashımov osyndaı pikir bildirdi. Eske salaıyq, búgin Astanada birqatar BAQ basshylary 2016 jyldyń 20 naýryzynda ótetin QR Parlamenti Májilisiniń jáne máslıhat depýtattarynyń saılaý naýqanyn aqparattandyrý barysynda etıkalyq normalardy saqtaý týraly Hartııaǵa qol qoıǵan bolatyn.

«Saılaý naýqany barysynda buqaralyq aqparat quraldarynyń alatyn orny erekshe. Óıtkeni, eń bastysy saılaýda halyq bılikke keletin adamdardy tańdap, saılaıdy. Al bılikke eń laıyqty adamdar kelýi shart. Sondyqtan da, bılikke kásibı tulǵalardy saılaý úshin BAQ erekshe yqpal jasaıdy», - dedi M. Bashımov.

Onyń aıtýynsha, qoldanystaǵy zańnamada da kandıdattar úshin tolyq ári senimdi aqparattar berý týraly norma qamtylǵan. Al Hartııada buǵan «ádil jáne ádiletti» degen normalar da qosa usynylyp otyr.

«Hartııada jýrnalısterdiń kásibı etıka normalary men minez-qulyq erejelerin buljytpaı oryndaýy kerektigi de qamtyldy. Osy arqyly jýrnalıster qaýymy qoǵamǵa, jalpy halyqqa kandıdattar arasynan laıyqty tulǵalardy tańdaýǵa kómektese alady dep senemin», - dedi M. Bashımov.

Aıta keteıik, Hartııanyń negizgi maqsaty - qazaqstandyqtardy saılaý naýqany barysynan, sonymen birge, QR Parlamenti Májilisi men máslıhattarynyń depýtattyǵyna kandıdattardyń qyzmetteri týraly BAQ-ta shynaıy ádil, tolyq jáne senimdi aqparattarmen qamtamasyz etý. Hartııada BAQ Parlament Májilisi men máslıhat depýtattyǵyna tirkelgen barlyq kandıdattardyń, olardyń saıası kózqarastaryna qaramastan, ózderine teńdeı múmkindikke ıe bolýyna yqpal ete alatyny jáne solaı etýge tıistiligi jazylǵan.