Saılaý: Almatyda máslıhat depýtattyǵyna 118 úmitker talasady

ALMATY. QazAqparat - Almaty qalasy aýmaqtyq saılaý komıssııasynyń tóraıymy Janna Asanova óńirlik kommýnıkatsııa alańynda ótken onlaın brıfıng barysynda QR Parlamenti Májilisiniń jáne máslıhat depýtattaryn saılaýǵa daıyndyq týraly aıtyp berdi, dep habarlaıdy QazAqparat tilshisi.

«QR Parlamenti Májilisiniń jáne Almaty qalalyq máslıhat depýtattaryn saılaý 2021 jyldyń 10 qańtaryna belgilendi. Saılaý jalpyǵa birdeı teń jáne tóte saılaý quqyǵy negizinde partııalyq tizim boıynsha jasyryn daýys berý jaǵdaıynda júzege asyrylady. Ár saılaýshy bir ret jáne tek bir kandıdatqa daýys bere alady. Saılaý ýchaskeleri 2020 jyldyń 26 jeltoqsanynan bastap ashyldy»,-deıdi spıker.

Onyń aıtýynsha, qazir qalada 581 saılaý ýchaskesi bar. 20 jeltoqsanyndaǵy jaǵdaı boıynsha Almaty qalasynda saılaýshylar sany 1 132 298 adamdy quraǵan.

«Ár ýchaske boıynsha saılaýshylar tizimin ákimdikter saılaý ýchaskelerine ótkizdi. Azamatty belgili bir saılaý ýchaskesinde saılaýshylar tizimine qosý úshin onyń osy saılaý ýchaskesinniń aýmaǵynda turǵylyqty jerinde turaqty tirkelý faktisi negiz bolady. Siz ózińizdiń saılaý ýchaskeńiz týraly aqparatty baılanys ortalyǵynda, sondaı-aq, @sailau_almaty Telegram botynda jáne Open Almaty jáne onlaın qyzmetterinde aqparat alýǵa jáne saılaýshylar tiziminen teksere alasyz»,-deıdi J. Asanova.

Sonymen qatar ol saılaý kúni qalada bolmaıtyndar syrttaı daýys berýge arnalǵan kýálik alý múmkindigi baryn atap ótti.

«Syrttaı bıýlletender berý 2021 jyldyń 9 qańtarynda jergilikti ýaqyt boıynsha 18.00-de toqtaıdy. Siz syrttaı bıýlletenmen osy kýálikti alǵan qaladan basqa (eger saılaýshy sol qalada tirkelgen bolsa) Qazaqstan Respýblıkasynyń kez kelgen aımaǵynda saılaýǵa qatysa alasyz. Eger siz densaýlyǵyńyzǵa baılanysty nemese otbasyńyzdaǵy naýqas adamdy kútýińizge baılanysty saılaý kúni jergilikti ýaqytpen saǵat 12.00-ge deıin daýys berýge kele almasańyz, jazbasha ótinish jazýyńyz kerek, al ýchaskelik komıssııa sizdiń turǵylyqty jerińiz boıynsha daýys berýdi uıymdastyrady»,-dedi ol.

Aıta ketsek, Almaty qalasynda 5 saıası partııanyń qalalyq fılıaldary Almaty qalasy máslıhaty depýtattyǵyna kandıdattardyń partııalyq tizimderin usynǵan.

Onyń ishinde «Nur Otan» partııasy - 15 adam, «Aýyl» halyqtyq-demokratııalyq patrıottyq partııasy – 6 adam, «Aq jol» demokratııalyq partııasy – 15 adam, «Qazaqstannyń halyq partııasy» – 15 adam, «Adal» saıası partııasy – 5 adam usyndy.

Barlyǵy - 119 adam, alaıda «Qazaqstan halyq partııasy» tiziminen bir adam óz kandıdatýrasyn alyp tastady.

Osylaısha Almaty qalasy máslıhatyndaǵy 39 depýtattyq mandatqa tirkelgen kandıdattardyń jalpy sany - 118 adam.