Saılaý aldyndaǵy ýádeler retimen oryndalýy kerek – Qasym-Jomart Toqaev

ASTANA. QazAqparat – Memleket basshysy Qasym-Jomart Toqaev VIII saılanǵan Qazaqstan Respýblıkasy Parlamentiniń birinshi sessııasynda saılaý aldyndaǵy ýádeler men baǵdarlamalardy oryndaýdyń mańyzdylyǵyna toqtaldy, dep habarlaıdy QazAqparat tilshisi.

«Memlekettik basqarýdyń tıimdiligin jáne strategııalyq josparlaýdyń sapasyn kóterý qajet. Saılaý aldyndaǵy baǵdarlamalar jáne ýádeler retimen oryndalýy kerek. Sonda azamattardyń bılikke jáne shynaıy ózgeriske degen senimi artady», - dedi Prezıdent.

Memleket basshysynyń paıymynsha, reformalardy ázirleý jáne júzege asyrý isinde memlekettik qyzmetshiler mańyzdy ról atqarady.

«Sol sebepti, jumysqa yntasy bar jáne joǵary bilikti mamandardy memlekettik qyzmetke tartý kerek. Jeke sektorda júrgen kásibı jáne daryndy basqarýshylar úshin jol ashyq bolýǵa tıis. Bizge memlekettik qyzmettiń barynsha úılesimdi úlgisine kóshý qajet. Ortalyqqa jaltaqtamaı, jergilikti jerde máseleni sheshýge daǵdylaný kerek. Memlekettik organdardaǵy jumysty uıymdastyrý mádenıetin de tolyq jańǵyrtqan jón», - dedi Qasym-Jomar Toqaev.

Aıta keteıik, elordada VIII saılanǵan Qazaqstan Respýblıkasy Parlamentiniń birinshi sessııasy ótip jatyr. Jıynǵa Memleket basshysy Qasym-Jomart Toqaev qatysýda.