Saılaý: Aqtóbelik egizder alǵash ret óz tańdaýyn jasady
Madııar men Danııar Ámirjanovtar Aqtóbe qalasyndaǵy №1 orta mektepte bilim aldy. Egizder bıyl kámelet jasqa toldy. Qazirgi kezde elordadaǵy S.Seıfýllın atyndaǵy agrarlyq ýnıversıtette «geodezııa» mamandyǵy boıynsha bilim alyp júr. Ekeýi bir topta. Búgin olar óz tańdaýyn jasaý úshin erte turyp, mektepte ornalasqan saılaý ýchaskesinde alǵashqylardyń biri bolyp daýys berdi.
«Azdap qorqynysh boldy. Biz kámelet jasqa tolyp, saılaýǵa birinshi ret qatysyp otyrmyz. Sondyqtan biz úshin óte mańyzdy qadam boldy, óz tańdaýymyzdy jasadyq. Elimizdegi saıası ózgeristerdi qarap otyramyz jáne óz úlesimizdi qosqymyz keledi. Elimizde amandyq, beıbitshilik bolsyn! Bul – bizdiń bolashaǵymyz», - dedi Madııar Ámirjanov.
Ámirjanovtar otbasynda bes bala bar. Madııar men Danııar otbasynyń úlkeni.
«Men de óz tańdaýymdy jasadym. Eldegi saıası ózgeristerge úles qosýdy sheshtim», - dedi Danııar Ámirjanov.
Aıta keteıik, Aqtóbe oblysy boıynsha 517 saılaý ýchaskesi bar. Onyń 162-si Aqtóbe qalasynda ornalasqan.